തൃശൂർ: ഗുരുവായൂരിൽ കൊള്ളപ്പലിശക്കാരുടെ ഭീഷണിയെ തുടർന്ന് വ്യാപാരി ആത്മഹത്യ ചെയ്ത സംഭവത്തിൽ ഒന്നാം പ്രതിയുടെ അടച്ചിട്ടിരുന്ന വീട്ടിന്റെ പൂട്ട് തകർത്ത് പൊലിസ് പരിശോധന നടത്തി. നെന്മിനി തൈവളപ്പിൽ പ്രഗിലേഷിന്റെ വീട്ടിലാണ് ഗുരുവായൂർ ടെമ്പിൾ പൊലിസിന്റെ നേതൃത്വത്തിൽ പരിശോധന നടന്നത്.

കർണ്ണംകോട്ട് ബസാർ മേക്കണ്ടാണത്ത് മുസ്തഫ (മുത്തു) ആത്മഹത്യ ചെയ്ത സംഭവത്തിലാണ് പൊലിസ് നടപടി. ഒക്ടോബർ 10-നാണ് മുസ്തഫയെ വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയത്. പലിശക്കാരുടെ ഭീഷണിയാണ് മരണത്തിന് കാരണമെന്ന് വ്യക്തമാക്കുന്ന ആത്മഹത്യാക്കുറിപ്പും കണ്ടെടുത്തിരുന്നു.

ALSO READ: ക്ലാസ്മുറിയിലെ ചൂരൽ പ്രയോ​ഗം: പരിമിതമായ അച്ചടക്ക അധികാരം ക്രൂരതയല്ല; അധ്യാപകനെതിരായ ക്രിമിനൽ നടപടികൾ റദ്ദാക്കി ഹൈക്കോടതി 

കഴിഞ്ഞ ദിവസം രാത്രി പരിശോധനയ്ക്ക് എത്തിയപ്പോൾ പ്രഗിലേഷിന്റെ വീട് അടച്ചിട്ടിരിക്കുകയായിരുന്നു. ഫോണിൽ ബന്ധപ്പെടാൻ സാധിക്കാത്തതിനെ തുടർന്ന് കോടതിയിൽനിന്ന് അനുമതി വാങ്ങിയശേഷം ആശാരിയെ ഉപയോഗിച്ച് പൂട്ടു പൊളിച്ചാണ് പൊലിസ് സംഘം അകത്തുകയറിയത്. വാർഡ് കൗൺസിലർ കെ.പി.എ. റഷീദ്, അയൽവാസി ഏറത്ത് രാജൻ എന്നിവരുടെ സാന്നിധ്യത്തിലായിരുന്നു പരിശോധന.

കണ്ടെടുത്തത് സുപ്രധാന രേഖകളും കാറുകളും

മുസ്തഫയുടെ സ്ഥലത്തിന്റെ കരം അടച്ച രസീത് അടക്കമുള്ള ചില സുപ്രധാന രേഖകൾ പൊലിസ് ഇവിടെനിന്ന് കണ്ടെടുത്തു. കൂടാതെ, ഒളിവിലായിരുന്ന പ്രതികളുടെ വീടുകളിൽ നടത്തിയ പരിശോധനയിൽ രണ്ട് കാറുകളും പൊലിസ് കസ്റ്റഡിയിലെടുത്തിട്ടുണ്ട്.

നെന്മിനി തൈവളപ്പിൽ പ്രഗിലേഷ്, കണ്ടാണശേരി സ്രാമ്പിക്കൽ ദിവേക് എന്നിവർക്കെതിരേയാണ് നിലവിൽ ഗുരുവായൂർ ടെമ്പിൾ പൊലിസ് ആത്മഹത്യാ പ്രേരണ കുറ്റത്തിന് (ഐ.പി.സി. 306) കേസെടുത്തിട്ടുള്ളത്. ഇരുവരും ഒളിവിൽ പോയതിനെ തുടർന്ന് ഇവരെ കണ്ടെത്താനുള്ള അന്വേഷണവും ഊർജിതമാക്കിയിരിക്കുകയാണ്.

നിരവധി പേരെ ഭീഷണിപ്പെടുത്തിയതിന്റെ തെളിവുകൾ

ആറു ലക്ഷം രൂപ പലിശക്കെടുത്ത മുസ്തഫയിൽ നിന്ന് 40 ലക്ഷം രൂപയോളം തിരിച്ചുവാങ്ങിയ ശേഷവും പ്രതികൾ ഭീഷണി തുടർന്നതാണ് ആത്മഹത്യയിലേക്ക് നയിച്ചതെന്നാണ് കുടുംബത്തിന്റെ പരാതി. ഇതിനു പുറമെ, മുസ്തഫയുടെ പേരിലുണ്ടായിരുന്ന മൂന്നര സെന്റ് സ്ഥലം പലിശക്കാർ എഴുതി വാങ്ങിയതായും സൂചനയുണ്ട്.

ഒന്നാംപ്രതി പ്രഗിലേഷ് നിരവധി പേരെ ഇത്തരത്തിൽ ഭീഷണിപ്പെടുത്തിയതിന്റെ ശബ്ദ സന്ദേശങ്ങൾ അടക്കമുള്ള തെളിവുകൾ പൊലിസിന് ലഭിച്ചിട്ടുണ്ട്. ആശുപത്രിയിൽ ചികിത്സയിലായിരുന്ന മുസ്തഫയെ ബലമായി ഇറക്കിക്കൊണ്ടുവന്ന് ഭാര്യയുടെയും മക്കളുടെയും മുന്നിലിട്ട് മർദിച്ചതായും കുടുംബം പൊലിസിന് നൽകിയ പരാതിയിൽ പറയുന്നു.

നിലവിൽ പ്രതികൾക്കെതിരെ ചുമത്തിയ ആത്മഹത്യാപ്രേരണ കുറ്റത്തിനു പുറമെ, നിരോധിക്കപ്പെട്ട പണമിടപാടുകൾ സംബന്ധിച്ച 'കുബേര ആക്ട്' കൂടി ചുമത്തുമെന്ന് പൊലിസ് അറിയിച്ചു. കേസിൽ കൂടുതൽ അന്വേഷണം നടന്നു വരികയാണ്. ഗുരുവായൂർ ടെമ്പിൾ എസ്.എച്ച്.ഒ. അജയകുമാർ, എസ്.കെ. ഗിരി എന്നിവരുടെ നേതൃത്വത്തിലുള്ള പൊലിസ് സംഘമാണ് പരിശോധന നടത്തിയത്.

In connection with the case, police have registered an abetment to suicide case against the first accused, Pragilesh, and another person. As both accused are absconding, the police broke the lock of Pragilesh's house with court permission to conduct a search and seized crucial documents, including land records and evidence of him threatening multiple other victims. The police are intensifying the search for the accused and plan to add the Kubera Act (against illegal money lending) to the charges.