മുംബൈ: ഐസിസി വനിതാ ഏകദിന ലോകകപ്പിൻ്റെ ഫൈനലിലേക്ക് മുന്നേറി ഇന്ത്യ. രണ്ടാം സെമിഫൈനലിൽ നിലവിലെ ചാമ്പ്യന്മാരായ ഓസ്ട്രേലിയയെ വീഴ്ത്തിയാണ് ഇന്ത്യ ഫൈനലിലേക്ക് മുന്നേറിയത്. നവി മുംബൈയിലെ ഡി.വൈ പാട്ടീൽ സ്റ്റേഡിയത്തിൽ നടന്ന ആവേശകരമായ പോരാട്ടത്തിൽ, യുവതാരം ജെമീമ റോഡ്രിഗസ് നേടിയ തകർപ്പൻ സെഞ്ച്വറിയും ക്യാപ്റ്റൻ ഹർമൻപ്രീത് കൗറിൻ്റെ മിന്നുന്ന അർദ്ധ സെഞ്ച്വറിയുമാണ് ഇന്ത്യയെ വിജയത്തിലേക്ക് നയിച്ചത്.

339 റൺസ് എന്ന കൂറ്റൻ വിജയലക്ഷ്യത്തിലേക്ക് ബാറ്റ് വീശിയ ഇന്ത്യക്ക് ഓപ്പണർമാരായ ഷഫാലി വർമയെയും സ്മൃതി മന്ദാനയെയും തുടക്കത്തിൽ തന്നെ നഷ്ടമായി. എന്നാൽ മൂന്നാം വിക്കറ്റിൽ ഒരുമിച്ച ജെമീമ റോഡ്രിഗസും (127)* ഹർമൻപ്രീത് കൗറും (84) ചേർന്ന് ഇന്ത്യൻ ഇന്നിംഗ്‌സിനെ മുന്നോട്ട് നയിച്ചു.

ഈ ചരിത്ര ഇന്നിങ്സിന് പിന്നാലെ ഒരു വമ്പൻ നേട്ടമാണ് ജെമീമ കൈവരിച്ചത്. ലോകകപ്പ് നോക്ക് ഔട്ട് മത്സരങ്ങളിൽ ചെയ്‌സ് ചെയ്ത് വിജയിച്ച മത്സരത്തിൽ ഏറ്റവും ഉയർന്ന റൺസ് നേടുന്ന താരമായാണ് ജെമീമ മാറിയത്. ചെയ്‌സ് ചെയ്ത് വിജയിക്കുന്ന മത്സരങ്ങളിൽ ആദ്യമായി സെഞ്ച്വറി നേടിയ താരവും ജെമീമ തന്നെയാണ്. എംഎസ് ധോണി, ഗൗതം ഗംഭീർ അടക്കമുള്ള ഇതിഹാസങ്ങളെ മറികടന്നാണ് ജെമീമ ചരിത്രനേട്ടം സ്വന്തമാക്കിയത്. 2011 ഐസിസി ഏകദിന ലോകകപ്പ് ഫൈനലിൽ ശ്രീലങ്കക്കെതിരെ ഗംഭീർ 97 റൺസും ധോണി പുറത്താവാതെ 91 റൺസും നേടിയാണ് തിളങ്ങിയത്. 

അതേസമയം മത്സരത്തിൽ ആദ്യം ബാറ്റ് ചെയ്ത ഓസ്‌ട്രേലിയ്ക്കായി 119 റൺസെടുത്ത ഓപ്പണർ ഫീബി ലിച്ച്ഫീൽഡിൻ്റെ സെഞ്ച്വറിയും എലീസ് പെറി, ആഷ്‌ലി ഗാർഡ്‌നർ എന്നിവരുടെ അർദ്ധ സെഞ്ച്വറികളുമാണ് മികച്ച ടോട്ടൽ നൽകിയത്. ഇന്ത്യക്കായി ശ്രീ ചരണിയും ദീപ്തി ശർമയും രണ്ട് വിക്കറ്റുകൾ വീതം വീഴ്ത്തി.

നവംബർ രണ്ടിനാണ് ഫൈനൽ പോരാട്ടം നടക്കുന്നത്. സൗത്ത് ആഫ്രിക്കയാണ് ഇന്ത്യയുടെ എതിരാളികൾ.