കൊച്ചി: ലിവ് ഇന്‍ പങ്കാളിയെ ക്രൂരമായി മര്‍ദിച്ചെന്ന കേസില്‍ യുവമോര്‍ച്ച നേതാവ് അറസ്റ്റില്‍. എറണാകുളം ജില്ലാ ജനറല്‍ സെക്രട്ടറി ഗോപു പരമശിവനാണ് അറസ്റ്റിലായത്. മൊബൈല്‍ ചാര്‍ജര്‍ ഉപയോഗിച്ചായിരുന്നു മര്‍ദനം. ദേഹമാസകലം മര്‍ദനമേറ്റ പാടുകളുമായി യുവതി മരട് പൊലിസ് സ്റ്റേഷനില്‍ എത്തി ഇയാള്‍ക്കെതിരെ പരാതി നല്‍കുകയായിരുന്നു.

ഇക്കഴിഞ്ഞ ബുധനാഴ്ച്ചയാണ് യുവതിക്ക് മര്‍ദ്ദനമേറ്റത്. പുറംഭാഗത്തും തുടകളിലുമടക്കം യുവതിയുടെ ദേഹമാകെ മര്‍ദ്ദിച്ചതിന്റെ പാടുകളുണ്ട്.

കഴിഞ്ഞ അഞ്ച് വര്‍ഷമായി യുവതിയും ഗോപു പരമശിവനും ഒരുമിച്ചായിരുന്നു താമസം. വൈറ്റില തൈക്കൂടത്തിനടുത്തുള്ള ഫ്ളാറ്റിലായിരുന്നു ഇരുവരും താമസിച്ചിരുന്നത്. കുറച്ച് ദിവസങ്ങള്‍ക്ക് മുമ്പ് യുവതിയെ കാണാനില്ലെന്ന് പറഞ്ഞ് ഗോപു പൊലിസില്‍ പരാതി നല്‍കിയിരുന്നു. തുടര്‍ന്ന് നടത്തിയ അന്വേഷണത്തില്‍ യുവതി ബന്ധുവീട്ടിലാണെന്നും ഇപ്പോള്‍ വരാന്‍ കഴിയില്ലെന്നും അറിയിച്ചു. ഇതിന് പിന്നാലെ ഇന്ന് യുവതി പൊലിസ് സ്റ്റേഷനിലെത്തി പരാതി നല്‍കുകയായിരുന്നു. 

പുറത്തുപോകാന്‍ സമ്മതിക്കാതെ വീട്ടില്‍ പൂട്ടിയിടുമായിരുന്നുവെന്നും ഇതിനു മുന്‍പും ക്രൂരമായി മര്‍ദ്ദിക്കുമായിരുന്നുവെന്നും യുവതി മൊഴി നല്‍കി. വിവാഹമോചിതയായ യുവതിക്ക് മുന്‍ബന്ധത്തിലെ കുട്ടിയെ കാണാന്‍ അനുവദിച്ചിരുന്നില്ലെന്നും കുട്ടിയെ കൊല്ലുമെന്ന് ഭീഷണിപ്പെടുത്തിയിരുന്നതായും യുവതി പറഞ്ഞു.

ഗോപു പരമശിവനെതിരെ വധശ്രമം ഉള്‍പ്പടെ വിവിധ വകുപ്പുകള്‍ പ്രകാരം കേസ് എടുത്തതായി പൊലിസ് പറഞ്ഞു. 

English summary: Yuva Morcha leader and Ernakulam district general secretary Gopu Paramashivan has been arrested for brutally assaulting his live-in partner in Kochi. The woman filed a complaint at the Maradu police station after arriving with severe injury marks all over her body, allegedly caused by beatings with a mobile charger cable.