കോഴിക്കോട്: കസ്റ്റഡിയിലെടുത്ത യുവതിയെ പീഡിപ്പിച്ചു എന്ന ഗുരുതര ആരോപണത്തിൽ വടകര ഡിവൈഎസ്‌പി ഉമേഷ് അവധിയിൽ പ്രവേശിച്ചു. ആരോഗ്യപരമായ കാരണങ്ങളാലാണ് അവധിയെടുത്തതെന്നാണ് ഔദ്യോഗിക വിശദീകരണം. ഇദ്ദേഹത്തിന് പകരമായി നാദാപുരം കൺട്രോൾ ഡിവൈഎസ്‌പിക്ക് ആയിരിക്കും ചുമതല.

ആരോപണവും അന്വേഷണ റിപ്പോർട്ടും

വടക്കഞ്ചേരി സിഐ ആയി സേവനമനുഷ്ഠിക്കുന്ന സമയത്ത്, ഒരു അനാശാസ്യ കേസിൽ കസ്റ്റഡിയിലെടുത്ത യുവതിയെ ഡിവൈഎസ്‌പി ഉമേഷ് പീഡിപ്പിക്കുകയും പിന്നീട് കേസെടുക്കാതെ വിട്ടയക്കുകയും ചെയ്തുവെന്നാണ് ആരോപണം.പൊലിസെന്ന ഔദ്യോഗിക പദവി ഉമേഷ് ദുരുപയോഗം ചെയ്തു എന്ന് അന്വേഷണ റിപ്പോർട്ടിൽ വ്യക്തമാക്കുന്നു. ഈ റിപ്പോർട്ട് സമർപ്പിച്ചതിന് തൊട്ടുപിന്നാലെയാണ് ഡിവൈഎസ്‌പി അവധിയിൽ പ്രവേശിക്കുന്നത്.

ആത്മഹത്യാക്കുറിപ്പിലെ വെളിപ്പെടുത്തൽ

ചെർപ്പുളശ്ശേരി എസ്.എച്ച്.ഒ ബിനു തോമസിന്റെ ആത്മഹത്യാക്കുറിപ്പിൽ മേലുദ്യോഗസ്ഥനെതിരേ ഗുരുതര ആരോപണങ്ങൾ. അനാശാസ്യത്തിന് അറസ്റ്റിലായ യുവതിയെ ഡിവൈ.എസ്.പി ഭീഷണിപ്പെടുത്തി പീഡിപ്പിച്ചെന്നാണ് കത്തിൽ പറയുന്നത്.പീഡിപ്പിക്കാൻ തന്നെയും നിർബന്ധിച്ചുവെന്നും പുറത്തറിയിക്കുമെന്ന് ഭീഷണിപ്പെടുത്തിയതായും കത്തിലുണ്ട്. കഴിഞ്ഞ 15നാണ് ബിനു ആത്മഹത്യ ചെയ്തത്. ആത്മഹത്യാ കുറിപ്പ് അന്നുതന്നെ കിട്ടിയിരുന്നെങ്കിലും ക്രൈംബ്രാഞ്ച് പൂഴ്ത്തിവയ്ക്കുകയായിരുന്നു. ഇതാണ് ഇപ്പോൾ പുറത്തായത്. 

2014ൽ പാലക്കാട്ട് സർവിസിലിരിക്കെ നടന്ന കാര്യങ്ങളാണ് 32 പേജുള്ള കത്തിലുള്ളത്. അനാശാസ്യത്തിനു യുവതിയെ പിടികൂടിയതാണ് സംഭവങ്ങളുടെ തുടക്കം. അറസ്റ്റ് ചെയ്ത അന്നേ ദിവസം അവരെ സ്റ്റേഷനിൽ എത്തിച്ചിരുന്നെങ്കിലും പിന്നീട് പറഞ്ഞുവിട്ടു.അന്നേ ദിവസം രാത്രി മേലുദ്യോഗസ്ഥൻ സ്ത്രീയുടെ വീട്ടിലെത്തുകയും താൽപര്യമില്ലാതിരുന്ന ബിനു തോമസിനെ ബ്ലാക്ക് മെയിൽ ചെയ്ത് കൂട്ടിക്കൊണ്ട് പോയതായും അതിനുശേഷം ഇക്കാര്യം പറഞ്ഞ് നിരന്തരം മാനസികമായി വേദനിപ്പിച്ചതായും കുറിപ്പിൽ പറയുന്നു. 

 യുവതിയുടെ മൊഴി

കഴിഞ്ഞ ദിവസം ഇതേ യുവതി ജില്ലാ ക്രൈംബ്രാഞ്ച് ഡിവൈഎസ്‌പിക്ക് മൊഴി നൽകി. ഡിവൈഎസ്‌പി തന്നെ പലതവണ ഭീഷണിപ്പെടുത്തി പീഡിപ്പിച്ചു എന്ന് യുവതി മൊഴി നൽകി.തനിക്കൊപ്പം പിടിയിലായവരിൽ നിന്ന് ഡിവൈഎസ്‌പി കൈക്കൂലി വാങ്ങിയതായും യുവതി വെളിപ്പെടുത്തി.

 നിയമനടപടിക്ക് സാധ്യത

യുവതിയുടെ മൊഴിയുടെ അടിസ്ഥാനത്തിൽ ഡിവൈഎസ്‌പിക്കെതിരെ ബലാത്സംഗ കുറ്റം ചുമത്തി കേസെടുക്കാൻ സാധ്യതയുണ്ട്. ഡിവൈഎസ്‌പിക്കെതിരെ നിയമനടപടി സ്വീകരിക്കാൻ പാലക്കാട് എസ്പി സംസ്ഥാന പൊലിസ് മേധാവിക്ക് റിപ്പോർട്ട് നൽകിയിട്ടുണ്ട്.