തിരുവനന്തപുരം: നാഗർകോവിൽ അണ്ണാ ബസ് സ്റ്റാൻഡിൽ നടന്ന കൊലപാതകവുമായി ബന്ധപ്പെട്ട് എട്ട് മാസമായി ഒളിവിലായിരുന്ന പ്രതിയെ തമിഴ്‌നാട് പൊലിസ് പിടികൂടി. തിരുവല്ലം സ്വദേശിയായ സുമേഷ് (29) ആണ് അറസ്റ്റിലായത്.

 നെല്ലായി മുകുടൽ പാപക്കുടി സ്വദേശിയായ ബൽരാജ് (32) ആണ് കൊല്ലചെയ്യപ്പെട്ടത്. ഇയാൾ ബസ് സ്റ്റാൻഡിലെ ക്ലീനറായിരുന്നു. കഴിഞ്ഞ മാർച്ചിലാണ് ബൽരാജിനെ അണ്ണാ ബസ് സ്റ്റാൻഡിൽ മരിച്ച നിലയിൽ കണ്ടെത്തിയത്.ആദ്യം മദ്യപാനം മൂലമുണ്ടായ അപകടമരണമെന്നാണ് പൊലിസ് കേസ് രജിസ്റ്റർ ചെയ്തത്. എന്നാൽ, പോസ്റ്റ്‌മോർട്ടം റിപ്പോർട്ടിൽ മർദനമേറ്റതിൻ്റെ ലക്ഷണങ്ങൾ കണ്ടതോടെയാണ് മരണം കൊലപാതകമാണെന്ന് പൊലിസ് സ്ഥിരീകരിച്ചത്.

കൊലപാതകമാണെന്ന് കണ്ടെത്തിയതിനെത്തുടർന്ന് നടത്തിയ അന്വേഷണത്തിൽ, ബൽരാജുമായി ഒരാൾ തർക്കിക്കുന്നതിൻ്റെ സിസിടിവി ദൃശ്യങ്ങൾ പൊലിസിന് ലഭിച്ചു.പ്രതിയെ പിടികൂടാനായി ജില്ലാ പൊലിസ് സൂപ്രണ്ട് സ്റ്റാലിൻ്റെ നിർദ്ദേശപ്രകാരം പ്രത്യേക അന്വേഷണ സംഘം രൂപീകരിച്ചു.തമിഴ്നാടിൻ്റെ വിവിധ ഭാഗങ്ങളിൽ നടത്തിയ തിരച്ചിലിന് ശേഷം, എട്ട് മാസത്തെ ശ്രമങ്ങൾക്കൊടുവിൽ പ്രതിയായ സുമേഷിനെ തിരുവനന്തപുരത്തെത്തി പൊലിസ് പിടികൂടുകയായിരുന്നു.മദ്യപാനത്തെത്തുടർന്നുണ്ടായ തർക്കത്തിനിടെ ബൽരാജിനെ മർദിച്ചതായി സുമേഷ് സമ്മതിച്ചു. ഇയാളെ കോടതിയിൽ ഹാജരാക്കി.