ദുബൈ: "സീറോ ബ്യൂറോക്രസി" പദ്ധതിയുടെ ഭാഗമായി പുതിയൊരു തീരുമാനം പ്രഖ്യാപിച്ചിരിക്കുകയാണ് യുഎഇ. ഇനിമുതൽ എമിറാത്തി പൗരന്മാർക്ക് അവരുടെ പാസ്‌പോർട്ടുകളും എമിറേറ്റ്‌സ് ഐഡി കാർഡുകളും ഒറ്റ അപേക്ഷയിലൂടെ പുതുക്കാൻ സാധിക്കും. ഇത് നടപടിക്രമങ്ങൾ ലഘൂകരിക്കുകയും സമയം ലാഭിക്കുകയും ചെയ്യും.

ഒറ്റ സ്റ്റെപ്പിൽ പുതുക്കൽ (One step renewal)

ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) ആണ് പുതിയ സേവനം അവതരിപ്പിച്ചത്.

നേരത്തെ, പാസ്‌പോർട്ട്, എമിറേറ്റ്‌സ് ഐഡി എന്നിവ പുതുക്കുന്നതിന് പ്രത്യേകം അപേക്ഷകൾ സമർപ്പിക്കുകയും, പലതവണ പണം അടയ്ക്കുകയും ചെയ്യണമായിരുന്നു. എന്നാല്‍, പുതിയ സംവിധാനം ഈ എല്ലാ നടപടികളും UAEICP സ്മാർട്ട് ആപ്ലിക്കേഷനിലെ ഒറ്റ പേജിൽ സംയോജിപ്പിച്ചിട്ടുണ്ട്.

പാസ്‌പോർട്ട് കാലാവധി കഴിഞ്ഞവരും, എമിറേറ്റ്‌സ് ഐഡി കാലാവധി കഴിയാനിരിക്കുന്നവരുമായ പൗരന്മാർക്ക് ആപ്പിൽ ഈ സംയോജിത സേവനം കാണാൻ സാധിക്കും. വ്യക്തിഗത വിവരങ്ങളും ഫോട്ടോകളും എളുപ്പത്തിൽ അപ്‌ഡേറ്റ് ചെയ്യാനും ഈ പ്ലാറ്റ്‌ഫോം അവസരം നൽകുന്നു.

പൗരന്മാരുടെ അഭിപ്രായം മാനിച്ചുള്ള മാറ്റം

പാസ്‌പോർട്ടിന്റെയും, എമിറേറ്റ്‌സ് ഐഡിയുടെയും കാലാവധി തീരുന്നത് വ്യത്യസ്ത സമയങ്ങളിലായാണ്. ഇതിനാൽ ഉണ്ടാകുന്ന പ്രശ്നങ്ങൾ "സീറോ ബ്യൂറോക്രസി എക്‌സ്‌പോ"യിൽ വെച്ച് പൗരന്മാർ ചൂണ്ടിക്കാട്ടിയിരുന്നു. ഇതിനുള്ള പരിഹരിമായാണ്, രേഖകളുടെ കാലാവധി ഒരേ സമയം തീരുന്ന തരത്തിൽ പുതുക്കൽ പ്രക്രിയ ഏകീകരിച്ച് സർക്കാർ നടപടിയെടുത്തത്. 

വേഗമേറിയതും കാര്യക്ഷമവും

പുതിയ ഏകീകൃത പ്ലാറ്റ്‌ഫോം സേവനം ലഭ്യമാക്കുന്നതിനുള്ള സമയം കുറഞ്ഞത് 50 ശതമാനം വരെ കുറയ്ക്കുമെന്നാണ് പ്രതീക്ഷിക്കുന്നത്. കൂടാതെ ഉപഭോക്താക്കളുടെ അന്വേഷണങ്ങളും കോളുകളും 40 ശതമാനത്തോളം കുറയും.

മുഴുവൻ കുടുംബാംഗങ്ങളുടെയും പാസ്‌പോർട്ടുകളും തിരിച്ചറിയൽ രേഖകളും ഒറ്റ ആപ്ലിക്കേഷനിലൂടെ കൈകാര്യം ചെയ്യാൻ കഴിയുന്നത് ഡിജിറ്റൽ സർക്കാർ സേവനങ്ങളിലെ ഒരു വലിയ നേട്ടമാണ്.

സീറോ ബ്യൂറോക്രസി പദ്ധതിയുടെ ഭാഗം

യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം ജൂണിൽ ആരംഭിച്ച സീറോ ഗവൺമെന്റ് ബ്യൂറോക്രസി (ZGB) പ്രോഗ്രാമിന്റെ രണ്ടാം ഘട്ടത്തിന്റെ ഭാഗമാണ് ഈ നീക്കം. വേഗത്തിലുള്ളതും, ഉപയോക്തൃ സൗഹൃദപരവുമായ ഡിജിറ്റൽ സേവനങ്ങൾ നൽകുക എന്നതാണ് ഈ പദ്ധതിയുടെ ലക്ഷ്യം.

The UAE has introduced a new one-step service allowing Emiratis to renew their passports and Emirates ID cards together through the UAEICP app, cutting processing times by 50% and reducing customer inquiries by 40%.