നിലമ്പൂര്‍: നിലമ്പൂരില്‍ എല്‍.ഡി.എഫില്‍ നിന്ന് ഭരണം പിടിച്ചെടുത്ത് യു.ഡി.എഫ്. 36 വാര്‍ഡുകളില്‍ 28 വാര്‍ഡുകളില്‍ യു.ഡി.എഫും 7 വാര്‍ഡുകളില്‍ എല്‍.ഡി.എഫും വിജയിച്ചു. 

അതേസമയം, പി.വി അന്‍വറിന്റെ തൃണമൂലിനും നേട്ടമുണ്ടാക്കാനായില്ല. നിലമ്പൂര്‍ നഗരസഭയില്‍ അഞ്ചിടങ്ങളില്‍ തൃണമൂല്‍ കോണ്‍ഗ്രസ് പാര്‍ട്ടി സ്ഥാനാര്‍ഥികള്‍ മത്സരിച്ചിരുന്നുവെങ്കിലും എല്ലാവരും പരാജയപ്പെട്ടു. നിലമ്പൂര്‍ പാത്തിപ്പാറ ഡിവിഷനില്‍ അസൈനാര്‍, ആലുങ്ങല്‍-ലതികാ രാജീവ്, മുമ്മുള്ളി-ഷാജഹാന്‍ പാത്തിപ്പാറ, മുതീരി-നിയാസ്, വരമ്പന്‍പൊട്ടി-സുരേഷ് എന്നിവരാണ് മത്സരിച്ചത്.

തൃണമൂലിന്റെ പ്രധാന സ്ഥാനാര്‍ഥിയും മുമ്മുള്ളിവാര്‍ഡില്‍ മല്‍സരിച്ച പി.വി അന്‍വറിന്റെ ഇഷ്ടക്കാരനുമായ ഷാജഹാന്‍ പാത്തിപ്പാറയ്ക്ക് ആകെ ലഭിച്ചത് 7 വോട്ടാണ്. വരമ്പന്‍ പൊട്ടിയില്‍ സി.പി.എം സ്ഥാനാര്‍ഥിയാണ് വിജയിച്ചത്. ഇവിടെ അന്‍വറിന്റെ സ്ഥാനാര്‍ഥിക്ക് ആകെ ലഭിച്ചത് 13 വോട്ടാണ്. മറ്റ് മൂന്നിടങ്ങളില്‍ യു.ഡി.എഫ് സ്ഥാനാര്‍ഥികളും വിജയിച്ചു. മുതീരിയില്‍ 25വോട്ടുകളും, ആലുങ്ങലില്‍ 61 വോട്ടുകളും, പാത്തിപ്പാറയില്‍ 107 വോട്ടുകളുമാണ് തൃണമൂല്‍ സ്ഥാനാര്‍ഥികള്‍ക്ക് നേടാനായത്. ഇടതുപക്ഷവുമായി തെറ്റിയ പി.വി അന്‍വറിന്റെ നേതൃത്വത്തിലുള്ള തൃണമൂല്‍ കോണ്‍ഗ്രസിന് യു.ഡി.എഫിനൊപ്പം ചേരാന്‍ താത്പര്യമുണ്ടായിരുന്നെങ്കിലും യു.ഡി.എഫ് അത് പരിഗണിച്ചിരുന്നില്ല. ഒടുവില്‍ സ്വതന്ത്രരായി മത്സരിക്കാന്‍ തീരുമാനിക്കുകയായിരുന്നു. 

കഴിഞ്ഞ തവണ 22 സീറ്റുകളിലാണ് ഇടതുപക്ഷം ജയിച്ചത്. യു.ഡി.എഫ് പത്തും നേടി.