ദുബൈ: യുഎഇയിലെ ബാങ്കിംഗ് മേഖലയിൽ സുപ്രധാന മാറ്റം വരുന്നു. ജനുവരി 6 മുതൽ ഓൺലൈൻ കാർഡ് പേയ്‌മെന്റുകൾക്കുള്ള ഒടിപി (OTP) എസ്എംഎസ് വഴിയോ ഇമെയിൽ വഴിയോ അയക്കുന്നത് ബാങ്കുകൾ അവസാനിപ്പിക്കും. സുരക്ഷാ നടപടികൾ ശക്തമാക്കുന്നതിന്റെ ഭാഗമായി ഇനി മുതൽ ബാങ്കുകളുടെ ഔദ്യോഗിക മൊബൈൽ ആപ്പുകൾ വഴി മാത്രമേ ഇടപാടുകൾ സ്ഥിരീകരിക്കാൻ സാധിക്കൂ.

രാജ്യത്തെ പ്രമുഖ ബാങ്കുകൾ ഇതിനോടകം തന്നെ ഉപഭോക്താക്കൾക്ക് ഇതുസംബന്ധിച്ച അറിയിപ്പുകൾ നൽകിത്തുടങ്ങിയിട്ടുണ്ട്. ഓൺലൈനായി സാധനങ്ങൾ വാങ്ങുമ്പോഴോ പണം കൈമാറുമ്പോഴോ ഫോണിലേക്ക് ലഭിക്കുന്ന ആറ് അക്ക ഒടിപിക്ക് പകരം ബാങ്ക് ആപ്പിൽ വരുന്ന നോട്ടിഫിക്കേഷനിൽ 'അംഗീകാരം' (Approve) നൽകുകയാണ് വേണ്ടത്. ജനുവരി 6 മുതൽ ഒടിപി എസ്എംഎസ് സേവനങ്ങൾ പൂർണ്ണമായും നിർത്തലാക്കും.

ALSO READ: "വിഷമിക്കേണ്ട, നിങ്ങൾ സായിദിന്റെ നാട്ടിലാണ്"; ദുബൈയിൽ വഴിതെറ്റിയ പെൺകുട്ടികളെ പിതാവിന്റെ അരികിലെത്തിച്ച് പൊലിസ് 

യുഎഇ സെൻട്രൽ ബാങ്കിന്റെ നിർദ്ദേശപ്രകാരമാണ് ഈ പരിഷ്കാരം. എസ്എംഎസ് ഒടിപികൾ തട്ടിയെടുത്ത് നടക്കുന്ന സാമ്പത്തിക തട്ടിപ്പുകൾ തടയുകയാണ് ഇതിന്റെ പ്രധാന ലക്ഷ്യം. മൊബൈൽ ആപ്പുകൾ വഴിയുള്ള സ്ഥിരീകരണം കൂടുതൽ സുരക്ഷിതമാണെന്ന് വിദഗ്ധർ ചൂണ്ടിക്കാട്ടുന്നു.

ഉപഭോക്താക്കൾ ശ്രദ്ധിക്കാൻ

• നിങ്ങളുടെ ബാങ്കിന്റെ സ്മാർട്ട് മൊബൈൽ ആപ്പ് ഫോണിൽ ഇൻസ്റ്റാൾ ചെയ്തിട്ടുണ്ടെന്ന് ഉറപ്പുവരുത്തുക.
• ആപ്പിലെ നോട്ടിഫിക്കേഷനുകൾ പ്രവർത്തനക്ഷമമാക്കുക (Enable Notifications).
• ഇന്റർനെറ്റ് സൗകര്യമില്ലെങ്കിൽ ആപ്പ് വഴി എങ്ങനെ ട്രാൻസാക്ഷൻ സ്ഥിരീകരിക്കാം എന്നതിനെക്കുറിച്ച് ബാങ്കിൽ നിന്ന് വിവരങ്ങൾ തേടുക.

മൊബൈൽ ആപ്പ് ഉപയോഗിക്കാൻ താൽപ്പര്യമില്ലാത്തവർക്ക് എസ്എംഎസ് സൗകര്യം തുടരാൻ പ്രത്യേക രേഖാമൂലമുള്ള അപേക്ഷ നൽകേണ്ടി വരും. എന്നാൽ ഇത്തരം ഇടപാടുകളിൽ തട്ടിപ്പ് നടന്നാൽ അതിന്റെ ഉത്തരവാദിത്തം ഉപഭോക്താവിനായിരിക്കുമെന്നും ബാങ്കുകൾ മുന്നറിയിപ്പ് നൽകുന്നു.

uae introduces new regulation ending sms otp for banking and financial services from january 6 mandating secure app-based authentication ensuring faster safer digital payments reducing fraud enhancing user convenience and compliance with modern fintech security standards nationwide.