തിരുവനന്തപുരം: ജാമ്യവ്യവസ്ഥ ലംഘിച്ചതിനാൽ രാഹുൽ ഈശ്വറിന്റെ ജാമ്യം റദ്ദാക്കണമെന്ന് ആവശ്യപ്പെട്ട് പൊലിസ് കോടതിയിൽ. രാഹുൽ മാങ്കൂട്ടത്തിൽ കേസിലെ പരാതിക്കാരിയെ രാഹുൽ ഈശ്വർ യൂട്യൂബ് ചാനലിലൂടെ വീണ്ടും അധിക്ഷേപിച്ചുവെന്ന് ചൂണ്ടിക്കാണിച്ചാണ് സൈബർ പൊലിസ് ജാമ്യം റദ്ദാക്കാനുള്ള നീക്കത്തിലേക്ക് കടന്നത്.

രാഹുൽ മാങ്കൂട്ടത്തിൽ എംഎൽഎ ഉൾപ്പെട്ട സ്ത്രീപീഡന കേസിൽ പരാതി നൽകിയ യുവതിയെ രാഹുൽ ഈശ്വർ തന്റെ യൂട്യൂബ് ചാനലിലൂടെ അധിക്ഷേപിച്ച സംഭവത്തിലാണ് രാഹുലിനെ നേരത്തെ പൊലിസ് കേസെടുത്ത് അറസ്റ്റ് ചെയ്തത്. കേസിൽ ജാമ്യം നൽകുന്ന സമയത്ത് പരാതിക്കാരിക്കെതിരെ മോശം പരാമർശങ്ങൾ നടത്തരുതെന്ന് കോടതി കർശന നിർദ്ദേശം നൽകിയിരുന്നു.

എന്നാൽ, ഈ ജാമ്യ വ്യവസ്ഥ ലംഘിക്കപ്പെട്ടുവെന്നാണ് പൊലിസ് കോടതിയെ അറിയിച്ചത്. യുട്യൂബ് ചാനലിലൂടെ നടത്തിയ വിഡിയോ പരാമർശങ്ങൾ അതിജീവിതയുടെ അന്തസ്സിനെ ബാധിക്കുന്നതാണെന്നും അന്വേഷണത്തെ സ്വാധീനിക്കാൻ സാധ്യതയുള്ളതാണെന്നും പൊലിസ് ജാമ്യാപേക്ഷ റദ്ദാക്കണമെന്ന് ആവശ്യപ്പെട്ട് നൽകിയ അപേക്ഷയിൽ പറയുന്നു.