വയനാട് : മേപ്പാടിയിൽ സീബ്രാലൈനിലൂടെ റോഡ് മുറിച്ചു കടക്കുകയായിരുന്ന വിദ്യാർഥിനികളെ ടോറസ് ലോറി ഇടിച്ചുതെറിപ്പിച്ചു. വൈകുന്നേരം നാലരയോടെ മേപ്പാടി ടൗണിലായിരുന്നു അപകടം. പരുക്കേറ്റ രണ്ട് വിദ്യാർഥിനികളെ മേപ്പാടിയിലെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇവരുടെ പരുക്ക് സാരമുള്ളതല്ലെന്നാണ് പ്രാഥമിക വിവരം. സ്കൂൾ സമയത്ത് ടിപ്പർ ലോറികൾക്ക് നിയന്ത്രണമുള്ളപ്പോഴാണ് നിയമം ലംഘിച്ച് വാഹനങ്ങൾ ചീറിപ്പായുന്നതെന്ന് നാട്ടുകാർ പറയുന്നു.

സ്കൂൾ വിട്ട് സഹപാഠികൾക്കൊപ്പം വീട്ടിലേക്ക് മടങ്ങുകയായിരുന്നു വിദ്യാർഥികൾ. നാല് കുട്ടികൾ ചേർന്ന് സീബ്രാലൈനിലൂടെ റോഡ് മുറിച്ചു കടക്കുന്നതിനിടെയാണ് അമിതവേഗത്തിലെത്തിയ ടോറസ് ലോറി ഇവരെ ഇടിച്ചത്. മുന്നിൽ നടന്ന രണ്ട് കുട്ടികൾ റോഡ് മുറിച്ചു കടന്നതിന് തൊട്ടുപിന്നാലെ എത്തിയ മറ്റ് രണ്ട് പേരെ ലോറി ഇടിച്ചുതെറിപ്പിക്കുകയായിരുന്നു.

ALSO READ: പ്രസിഡന്റിന്റെ വാർഡിലെ കിണറിൽ 'സിപിഎം' എന്നെഴുതിയ ഗ്രിൽ: കാരശ്ശേരി പഞ്ചായത്ത് ഭരണസമിതിയിൽ തർക്കം; പ്രതിഷേധവുമായി യുഡിഎഫ്

വാഹനം വരുന്നത് കണ്ട് കുട്ടികൾ നിലവിളിച്ചുകൊണ്ട് മാറാൻ ശ്രമിച്ചെങ്കിലും അതിവേഗത്തിലെത്തിയ ലോറി കുട്ടികളെ തട്ടി തെറിപ്പിക്കുകയായിരുന്നു. റോഡിലേക്ക് തെറിച്ചുവീണ വിദ്യാർഥിനികളെ ഉടൻ തന്നെ നാട്ടുകാരും വ്യാപാരികളും ചേർന്ന് ആശുപത്രിയിലെത്തിച്ചു. പരുക്കേറ്റവരിൽ ഒരാൾ പ്രാഥമിക ചികിത്സയ്ക്ക് ശേഷം ആശുപത്രി വിട്ടു.

അപകടത്തിന്റെ ഭീതിയേറ്റുന്ന സിസിടിവി ദൃശ്യങ്ങൾ പുറത്തുവന്നിട്ടുണ്ട്. സീബ്രാലൈനിന് സമീപത്തെ കടയിലെ ക്യാമറയിലാണ് ദൃശ്യങ്ങൾ പതിഞ്ഞത്. ഡ്രൈവർ വേഗത കുറയ്ക്കാതെ വാഹനം ഓടിച്ചതാണ് അപകടത്തിന് കാരണമെന്ന് ദൃശ്യങ്ങളിൽ നിന്ന് വ്യക്തമാണ്. സംഭവത്തിൽ മേപ്പാടി പൊലിസ് കേസെടുക്കും. സീബ്രാലൈനിലൂടെ കാൽനടയാത്രക്കാർ റോഡ് മുറിച്ചുകടക്കുമ്പോൾ വാഹനം നിർത്താതെ പോയതിനും അശ്രദ്ധമായി വണ്ടിയോടിച്ചതിനും ഡ്രൈവർക്കെതിരെ കർശന നടപടിയുണ്ടാകുമെന്ന് പൊലിസ് അറിയിച്ചു.

Two schoolgirls were injured after being hit by a speeding Taurus lorry while crossing the road at a zebra crossing in Meppadi, Wayanad. The incident occurred around 4:30 PM as the students were returning home from school. Shocking CCTV footage shows the lorry failing to slow down, striking two of the four students who were mid-way across the road.