കുവൈത്ത് സിറ്റി: രാജ്യത്തെ ആരോഗ്യ സേവനങ്ങളുടെ നിലവാരം ഉയര്‍ത്തുന്നതിനായി ഡോക്ടര്‍മാരുടെ പരിശീലനത്തിനും വിദ്യാഭ്യാസത്തിനും കൂടുതല്‍ നിക്ഷേപം നടത്തുമെന്ന് കുവൈത്ത് ആരോഗ്യ മന്ത്രാലയം അറിയിച്ചു. വിവിധ വൈദ്യശാസ്ത്ര മേഖലകളില്‍ പ്രവര്‍ത്തിക്കുന്ന ഡോക്ടര്‍മാര്‍ക്ക് പുതിയ അറിവുകളും ആധുനിക ചികിത്സാ രീതികളും പരിചയപ്പെടുത്തുക എന്നതാണ് പദ്ധതിയുടെ പ്രധാന ലക്ഷ്യം.

ആരോഗ്യ സേവനങ്ങള്‍ക്ക് പിന്തുണ നല്‍കുന്ന അസിസ്റ്റന്റ് അണ്ടര്‍സെക്രട്ടറി ഡോ. അബ്ദുള്ള അല്‍ഫാരസ്, വാര്‍ഷിക ആര്‍ത്തോപീഡിക് സര്‍ജറി സമ്മേളനം ഉദ്ഘാടനം ചെയ്യുന്നതിനിടെയാണ് ഇതുസംബന്ധിച്ച വിശദീകരണം നല്‍കിയത്. ആരോഗ്യ മന്ത്രി ഡോ. അഹ്മദ് അല്‍അവാദിയുടെ പേരിലാണ് അദ്ദേഹം സംസാരിച്ചത്.

മെഡിക്കല്‍ രംഗത്ത് നിരന്തരം സംഭവിക്കുന്ന മാറ്റങ്ങള്‍ക്കനുസരിച്ച് ഡോക്ടര്‍മാര്‍ക്ക് പരിശീലനം നല്‍കേണ്ടത് അത്യാവശ്യമാണെന്ന് ഡോ. അല്‍ഫാരസ് പറഞ്ഞു. രോഗനിര്‍ണയം, ശസ്ത്രക്രിയ, ചികിത്സാ രീതികള്‍ എന്നിവയില്‍ പുതിയ സാങ്കേതിക വിദ്യകള്‍ സ്വീകരിക്കുന്നതിലൂടെ രോഗികള്‍ക്ക് മികച്ച സേവനം ഉറപ്പാക്കാനാകുമെന്നും അദ്ദേഹം വ്യക്തമാക്കി.

സമ്മേളനത്തിന്റെ ഭാഗമായി ശാസ്ത്രീയ പ്രഭാഷണങ്ങളും പ്രായോഗിക പരിശീലന വര്‍ക്ക്‌ഷോപ്പുകളും സംഘടിപ്പിച്ചിട്ടുണ്ട്. ശസ്ത്രക്രിയാ പരിശീലനത്തിനായി മനുഷ്യ ശരീരത്തിന്റെ ഘടന നേരിട്ട് പഠിക്കാന്‍ അവസരമൊരുക്കുന്ന പ്രത്യേക പരിശീലനവും ഇതില്‍ ഉള്‍പ്പെടുത്തിയിട്ടുണ്ട്. കുവൈത്ത് സര്‍വകലാശാലയുടെ മെഡിക്കല്‍ വിഭാഗത്തിന്റെ സഹകരണത്തോടെയാണ് ഇത് നടപ്പാക്കുന്നത്.

ALSO READ: പ്രവാസികൾക്ക് ആശ്വാസം; മൾട്ടിപ്പിൾ എക്സിറ്റ് പെർമിറ്റ് സംവിധാനം ആരംഭിച്ച് കുവൈത്ത്

ഡോക്ടര്‍മാരുടെ കഴിവുകള്‍ മെച്ചപ്പെടുത്തുന്നതിനൊപ്പം ആരോഗ്യ രംഗത്തെ ഗവേഷണ പ്രവര്‍ത്തനങ്ങള്‍ക്കും പ്രോത്സാഹനം നല്‍കുകയാണ് ലക്ഷ്യമെന്ന് ആരോഗ്യ മന്ത്രാലയം അറിയിച്ചു. ഇതിന്റെ ഭാഗമായി അന്താരാഷ്ട്ര തലത്തില്‍ പ്രവര്‍ത്തിക്കുന്ന വിവിധ മെഡിക്കല്‍ സംഘടനകളുമായി സഹകരണം ശക്തമാക്കാനും പദ്ധതിയുണ്ട്.

ഡോക്ടര്‍മാരുടെ തുടര്‍ച്ചയായ പരിശീലനം ആരോഗ്യ സേവനങ്ങളുടെ ഗുണനിലവാരം ഉയര്‍ത്തുമെന്നും, രോഗികള്‍ക്ക് കൂടുതല്‍ സുരക്ഷിതവും കാര്യക്ഷമവുമായ ചികിത്സ ലഭ്യമാക്കാന്‍ ഇത് സഹായിക്കുമെന്നും അധികൃതര്‍ വ്യക്തമാക്കി.

Kuwait is investing in doctor training and medical education to improve healthcare services and ensure better treatment quality, officials said.