കോതമംഗലം: എറണാകുളം ജില്ലയിലെ കോതമംഗലത്ത് ടൂറിസ്റ്റ് ബസിന് തീപിടിച്ചു. ഇന്ന് രാത്രിയോടെ തലക്കോട് ഭാഗത്തുവെച്ചാണ് അപകടമുണ്ടായത്. തീപിടിത്തത്തിൽ ബസ് പൂർണ്ണമായും കത്തിനശിച്ചു. സംഭവത്തിൽ യാത്രക്കാർ അത്ഭുതകരമായി രക്ഷപ്പെട്ടു.

ALSO READ: യു.പിയിൽ വീട്ടിനുള്ളിൽ നിസ്‌കരിച്ചവർ അറസ്റ്റിൽ; ശക്തമായ പ്രതിഷേധം 

കോട്ടപ്പടി ഭാഗത്തുനിന്നും വരികയായിരുന്ന ബസിനാണ് തീപിടിച്ചത്. ഇടുക്കി ശാന്തൻപാറ സ്വദേശികളാണ് ബസിലുണ്ടായിരുന്നത്. ഒരു വിവാഹ ചടങ്ങിൽ പങ്കെടുത്ത ശേഷം മടങ്ങിപ്പോകുകയായിരുന്നു ഇവർ. യാത്രയ്ക്കിടെ ബസിന്റെ ഉൾഭാഗത്തുനിന്നും പുക ഉയരുന്നത് ശ്രദ്ധയിൽപ്പെട്ട ഡ്രൈവർ ഉടൻതന്നെ വാഹനം റോഡരികിൽ ഒതുക്കി നിർത്തി. ഇതാണ് വലിയൊരു ദുരന്തം ഒഴിവാക്കാൻ കാരണമായത്.

ALSO READ: കേരളത്തില്‍ എസ്.ഐ.ആര്‍ തീയതി നീട്ടി; ആക്ഷേപങ്ങള്‍ സമര്‍പ്പിക്കാന്‍ 30 വരെ സമയം

തീ പടരുന്നതിന് മുൻപ് തന്നെ ബസിലുണ്ടായിരുന്ന മുഴുവൻ യാത്രക്കാരെയും പുറത്തിറക്കാൻ സാധിച്ചു. നിമിഷങ്ങൾക്കകം തീ ആളിപ്പടരുകയും ബസ് പൂർണ്ണമായും അഗ്നിക്കിരയാവുകയും ചെയ്തു.

റോഡിൽ ബസ് കത്തുന്നത് കണ്ട നാട്ടുകാരാണ് ആദ്യം രക്ഷാപ്രവർത്തനത്തിന് ഓടിയെത്തിയത്. തുടർന്ന് അഗ്നിശമന സേനയെ വിവരമറിയിക്കുകയായിരുന്നു. കോതമംഗലത്തുനിന്നും എത്തിയ ഫയർഫോഴ്സ് യൂണിറ്റുകൾ ഏറെ നേരത്തെ പരിശ്രമത്തിനൊടുവിലാണ് തീയണച്ചത്. എന്നാൽ അപ്പോഴേക്കും ബസിന്റെ പുറംഭാഗവും സീറ്റുകളും ഉൾപ്പെടെ പൂർണ്ണമായി കത്തിയമർന്നിരുന്നു. ബസിലുണ്ടായിരുന്ന ശാന്തൻപാറ സ്വദേശികൾക്ക് മറ്റൊരു യാത്രാസൗകര്യം ഏർപ്പെടുത്താനുള്ള ശ്രമങ്ങൾ അധികൃതർ നടത്തിവരികയാണ്. ആർക്കും പരുക്കുകളില്ല എന്നത് വലിയ ആശ്വാസമായി.

ALSO READ: ട്രംപ് ഞങ്ങളെ ചാവേറുകളാക്കി വഞ്ചിച്ചു: പരാതിയുമായി ഇറാനിലെ ഭരണവിരുദ്ധ പ്രക്ഷോഭകർ   

ബസിന് തീപിടിച്ചതിനെത്തുടർന്ന് കോതമംഗലം-മൂവാറ്റുപുഴ റോഡിൽ കിലോമീറ്ററുകളോളം ഗതാഗത തടസ്സമുണ്ടായി. ഫയർഫോഴ്സ് തീയണച്ച ശേഷം ബസ് റോഡരികിലേക്ക് മാറ്റിയതോടെയാണ് ഗതാഗതം പുനഃസ്ഥാപിച്ചത്. ഷോർട്ട് സർക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനം. എങ്കിലും സാങ്കേതിക വിദഗ്ധർ പരിശോധന നടത്തിയ ശേഷമേ കൃത്യമായ കാരണം വ്യക്തമാകൂ എന്ന് പോലീസ് അറിയിച്ചു.

സംഭവത്തിൽ കോതമംഗലം പൊലിസ് കേസ് രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്. വിവാഹ ആഘോഷം കഴിഞ്ഞ് മടങ്ങിയ സംഘത്തിന്റെ യാത്ര വലിയൊരു അപകടത്തിന്റെ വക്കിലെത്തിയിട്ടും പരുക്കുകളില്ലാതെ അവസാനിച്ചതിന്റെ ആശ്വാസത്തിലാണ് എല്ലാവരും.

A tourist bus carrying a wedding party was completely destroyed by fire near Kothamangalam, Ernakulam. The incident occurred at Thallakkode as the group from Santhanpara was returning from a wedding. Fortunately, all passengers managed to evacuate the vehicle immediately after noticing the smoke, preventing a major tragedy. Fire and rescue services eventually extinguished the flames, though the bus was burnt to a shell.