തിരുവനന്തപുരം: കേരള പൊലിസിനെ ഞെട്ടിച്ചുകൊണ്ട് തലസ്ഥാനത്ത് പൊലിസുകാർ തന്നെ ലഹരിക്കച്ചവടത്തിന് ഒത്താശ ചെയ്ത സംഭവം പുറത്തുവരുന്നു. ലഹരി സംഘങ്ങളുമായി നേരിട്ട് ബന്ധം പുലർത്തുകയും കച്ചവടത്തിന് കൂട്ടുനിൽക്കുകയും ചെയ്ത രണ്ട് സിവിൽ പൊലിസ് ഓഫീസർമാരെ സർവീസിൽ നിന്നും സസ്പെൻഡ് ചെയ്തു.

തിരുവനന്തപുരം റൂറൽ കൺട്രോൾ റൂമിലെ സി.പി.ഒമാരായ അഭിൻജിത്ത്, രാഹുൽ എന്നിവർക്കെതിരെയാണ് കർശന നടപടി സ്വീകരിച്ചിരിക്കുന്നത്. തിരുവനന്തപുരം റൂറൽ എസ്.പി കിരൺ നാരായണന്റേതാണ് ഉത്തരവ്. ലഹരി വിരുദ്ധ പ്രവർത്തനങ്ങൾ ഏകോപിപ്പിക്കേണ്ട വിഭാഗത്തിൽ നിന്നുള്ളവരുടെ ഈ വീഴ്ച ഗൗരവത്തോടെയാണ് വകുപ്പ് കാണുന്നത്.

ALSO READ: സർക്കാർ മെഡിക്കൽ കോളേജ് ഡോക്ടർമാർ അനിശ്ചിതകാല സമരത്തിലേക്ക്; ചികിത്സാ സേവനങ്ങളും പരീക്ഷകളും തടസ്സപ്പെടും

നാർക്കോട്ടിക് സെൽ ലഹരി മാഫിയകളെ കേന്ദ്രീകരിച്ച് നടത്തിയ രഹസ്യ അന്വേഷണത്തിലാണ് പൊലിസുകാരുടെ പങ്ക് സംബന്ധിച്ച ഞെട്ടിക്കുന്ന വിവരങ്ങൾ പുറത്തുവന്നത്. ലഹരി മാഫിയയുമായി ഇവർ നിരന്തരം സമ്പർക്കം പുലർത്തിയിരുന്നതായും സാമ്പത്തിക ഇടപാടുകൾ നടത്തിയതായും അന്വേഷണത്തിൽ വ്യക്തമായിട്ടുണ്ട്.

കൺട്രോൾ റൂമിലെ ഡ്യൂട്ടിയിലുണ്ടായിരുന്ന ഇവർ പൊലിസ് വയർലെസ് സന്ദേശങ്ങൾ ചോർത്തിയതായും ആക്ഷേപമുണ്ട്. റെയ്ഡുകളെക്കുറിച്ചും ലഹരി വേട്ടയെക്കുറിച്ചുമുള്ള നിർണ്ണായക വിവരങ്ങൾ ലഹരി മാഫിയാ സംഘങ്ങൾക്ക് ഇവർ മുൻകൂട്ടി ചോർത്തി നൽകിയിട്ടുണ്ടോ എന്ന് പൊലിസ് പരിശോധിച്ചു വരികയാണ്.

ലഹരി വിരുദ്ധ പോരാട്ടത്തിൽ പൊലിസിന് ലഭിക്കുന്ന അതീവ രഹസ്യമായ വിവരങ്ങൾ വയർലെസ് സെറ്റുകൾ വഴി ഈ ഉദ്യോഗസ്ഥർക്ക് അറിയാൻ കഴിയുമായിരുന്നു. ഈ പദവി ദുരുപയോഗം ചെയ്ത് ലഹരി കടത്തുകാരെ പൊലിസ് നീക്കങ്ങളിൽ നിന്ന് രക്ഷപ്പെടാൻ ഇവർ സഹായിച്ചതായാണ് പ്രാഥമിക നിഗമനം.

സംഭവവുമായി ബന്ധപ്പെട്ട് കൂടുതൽ ഉദ്യോഗസ്ഥർക്ക് ലഹരി മാഫിയയുമായി ബന്ധമുണ്ടോ എന്ന കാര്യത്തിൽ റൂറൽ എസ്.പി വിശദമായ അന്വേഷണത്തിന് ഉത്തരവിട്ടിട്ടുണ്ട്. അച്ചടക്ക ലംഘനം, ഗുരുതരമായ പെരുമാറ്റദൂഷ്യം എന്നിവയ്ക്കും പുറമെ പൊലിസ് സേനയുടെ അന്തസ്സിനും സൽപ്പേരിനും കളങ്കം വരുത്തിയതായും സസ്പെൻഷൻ ഉത്തരവിൽ പറയുന്നു.

കഴിഞ്ഞ കുറച്ചു നാളുകളായി തലസ്ഥാനത്തെ ലഹരി വിപണനത്തെക്കുറിച്ച് നാർക്കോട്ടിക് സെൽ നിരീക്ഷിച്ചു വരികയായിരുന്നു. പ്രധാന കണ്ണികളെ പിടികൂടാൻ ശ്രമിക്കുമ്പോഴെല്ലാം അവർ രക്ഷപ്പെടുന്ന സാഹചര്യമുണ്ടായതോടെയാണ് പോലീസിനുള്ളിലെ കറുത്ത ആടുകളെ കണ്ടെത്താൻ അന്വേഷണം വ്യാപിപ്പിച്ചത്.

പൊലിസുകാരുടെ ഫോൺ രേഖകളും ബാങ്ക് അക്കൗണ്ട് വിവരങ്ങളും വരും ദിവസങ്ങളിൽ പരിശോധനയ്ക്ക് വിധേയമാക്കും. ലഹരി മാഫിയയിൽ നിന്ന് ഇവർ കൈപ്പറ്റിയ തുകയെക്കുറിച്ചും പകരമായി നൽകിയ സേവനങ്ങളെക്കുറിച്ചും സൈബർ സെല്ലിന്റെ സഹായത്തോടെ വിശദമായ തെളിവെടുപ്പ് നടക്കും.

സേനയുടെ ഭാഗമായവർ തന്നെ നിയമലംഘകർക്ക് കൂട്ടുനിൽക്കുന്നത് ഒരു കാരണവശാലും അംഗീകരിക്കാനാവില്ലെന്ന് ആഭ്യന്തര വകുപ്പ് വ്യക്തമാക്കി. കർശനമായ നടപടികളിലൂടെ സേനയിലെ ശുദ്ധീകരണ പ്രക്രിയ തുടരുമെന്നാണ് ഉന്നത പൊലിസ് ഉദ്യോഗസ്ഥർ നൽകുന്ന സൂചന.

സംഭവത്തിൽ വകുപ്പുതല അന്വേഷണം പൂർത്തിയാകുന്ന മുറയ്ക്ക് ഇവർക്കെതിരെ ക്രിമിനൽ കേസുകൾ ഉൾപ്പെടെയുള്ള തുടർനടപടികൾ സ്വീകരിക്കും. സസ്പെൻഷനിലായ ഉദ്യോഗസ്ഥരെ ഉടൻ തന്നെ ചോദ്യം ചെയ്യാനായി നാർക്കോട്ടിക് സെൽ വിളിപ്പിക്കുമെന്നാണ് റിപ്പോർട്ടുകൾ.

Two Civil Police Officers (CPOs) from the Thiruvananthapuram Rural Control Room, Abhinjith and Rahul, have been suspended following allegations of maintaining close ties with a drug mafia. An investigation by the Narcotic Cell revealed that the duo was in constant contact with drug cartels and engaged in suspicious financial transactions.