തൊടുപുഴ: 10 വര്‍ഷത്തിനിടെ കേരളത്തില്‍ തെരുവ് നായയുടെ കടിയേറ്റ് മരിച്ചത് 118 പേര്‍. കൂടുതല്‍ മരണം കൊല്ലം ജില്ലയില്‍, 21 പേര്‍. കുഞ്ഞുങ്ങള്‍ മുതല്‍ വയോധികര്‍ വരെ ഇരകളാണ്. വിവരാവകാശ നിയമപ്രകാരം ഫാര്‍മേഴ്സ് അവയര്‍നസ് റിവൈവല്‍ മൂവ്മെന്റ് (ഫാം) ജനറല്‍ സെക്രട്ടറി സിജുമോന്‍ ഫ്രാന്‍സീസിന് ലഭിച്ച മറുപടിയിലാണ് ഈ ഞെട്ടിപ്പിക്കുന്ന കണക്കുകളുള്ളത്.

സംസ്ഥാനത്ത് കൂടുതല്‍ മരണം റിപ്പോര്‍ട്ട് ചെയ്തത് കൊല്ലം ജില്ലയിലാണ്, 21 മരണം. മറ്റ് ജില്ലകളിലെ കണക്കുകള്‍. തിരുവനന്തപുരം 16, പാലക്കാട് 13, ആലപ്പുഴ 12, തൃശൂര്‍ 11, എറണാകുളം, കോഴിക്കോട് ഒന്‍പതുവീതം. ഒന്നേകാല്‍ വയസുള്ള കുഞ്ഞുമുതല്‍ 90 വയസുള്ള വയോധികര്‍ വരെ ആക്രമണത്തിന് ഇരയായി മരണപ്പെട്ടു. മരിച്ചവരില്‍ 12 പേര്‍ പത്ത് വയസില്‍ താഴെയുള്ളവരാണ്. 50 -60 പ്രായപരിധിയിലുള്ളവരാണ് കൂടുതല്‍ (27പേര്‍) മരിച്ചതെന്നും കണക്കുകള്‍.

95% പേര്‍ക്കും വാക്സിന്‍ ലഭിച്ചില്ല
ലോകത്തിന് മാതൃകയെന്ന് അവകാശപ്പെടുന്ന കേരള ആരോഗ്യരംഗത്തിന് തിരിച്ചടിയാകുന്ന വിവരങ്ങളാണ് പുറത്തുവരുന്നത്. പേവിഷബാധയേറ്റു മരിച്ചവരില്‍ 95 ശതമാനം പേര്‍ക്കും കൃത്യസമയത്ത് വാക്സിന്‍ എടുക്കാന്‍ സാധിച്ചിരുന്നില്ല എന്നത് ഗൗരവതരമായ വീഴ്ചയായി ചൂണ്ടിക്കാണിക്കപ്പെടുന്നു.
നഷ്ടപരിഹാരമില്ല

ALSO READ: 'തെരുവ് നായ്ക്കളെ കുറിച്ച് ഇത്ര ആശങ്കയെങ്കില്‍ സ്വന്തം വീട്ടിലേക്ക് കൊണ്ടുപോയിക്കൂടേ, ജനങ്ങളെ കടിക്കാനായി അലയാന്‍ വിടണോ'  നായ്‌സ്‌നേഹികളോട് സുപ്രിം കോടതി

തെരുവ് നായ നിയന്ത്രണം തദ്ദേശ വകുപ്പിന്റെ ഉത്തരവാദിത്തമാണെങ്കിലും മരിച്ചവരുടെ കുടുംബത്തിനോ പരുക്കേറ്റവര്‍ക്കോ പഞ്ചായത്ത് വകുപ്പില്‍ നിന്നോ മുഖ്യമന്ത്രിയുടെ ദുരിതാശ്വാസനിധിയില്‍ നിന്നോ യാതൊരുവിധ നഷ്ടപരിഹാരവും നല്‍കുന്നില്ല. സുപ്രിംകോടതി നിര്‍ദേശപ്രകാരം രൂപീകരിച്ച റിട്ട. ജസ്റ്റിസ് സിരിജഗന്‍ കമ്മിറ്റിയാണ് ചികിത്സക്കായി നഷ്ടപരിഹാരം കൊടുക്കാന്‍ പഞ്ചായത്തുകള്‍ക്ക് നിര്‍ദ്ദേശം നല്‍കിവന്നിരുന്നത്. എന്നാല്‍ പിന്നീട് ഈ കമ്മറ്റിയുടെ പ്രവര്‍ത്തനം നിലച്ചു. പകരം കേരളാ ലീഗല്‍ സര്‍വിസ് അതോറിറ്റിയുടെ കീഴില്‍ എല്ലാ ജില്ലകളിലും ഡിസ്ട്രിക്ട് സ്ട്രേ ഡോഗ് വിക്ടിം കമ്മിറ്റി രൂപീകരിച്ച് സര്‍ക്കാര്‍ ഉത്തരവ് പുറപ്പെടുവിച്ചെങ്കിലും ഇതുവരെ പ്രവര്‍ത്തനം ആരംഭിച്ചിട്ടില്ല. തെരുവ് നായയുടെ കടിയേറ്റാല്‍ സ്വന്തം ചെലവില്‍ ചികിത്സ തേടേണ്ട അവസ്ഥയാണുള്ളത്.

ALSO READ: നായയെ ഓടിക്കാൻ പൂച്ചയെ വളർത്താം, നായയും പൂച്ചയും ശത്രുക്കളല്ലേ; തെരുവ് നായ വിഷയത്തിൽ മൃഗസ്നേഹികളെ പരിഹസിച്ച് സുപ്രീംകോടതി

അതേ സമയം അയല്‍ സംസ്ഥാനമായ കര്‍ണാടകയില്‍ തെരുവ് നായയുടെ കടിയേറ്റ് മരിക്കുന്നവരുടെ കുടുംബത്തിന് സര്‍ക്കാര്‍ അഞ്ച് ലക്ഷം രൂപ നഷ്ടപരിഹാരം നല്‍കുന്നുണ്ടെന്നതും ശ്രദ്ധേയമാണ്. ആക്രമണത്തില്‍ പരുക്കേല്‍ക്കുന്നവര്‍ക്ക് 5,000 രൂപ നഷ്ടപരിഹാരമായി ലഭിക്കും. ബെംഗളൂരു നഗരത്തില്‍ ആക്രമണത്തിന് ഇരയാകുന്നവര്‍ക്ക് നഷ്ടപരിഹാരം നല്‍കുന്ന നടപടികള്‍ പരിശോധിച്ച് ഉറപ്പുവരുത്താനായി പ്രത്യേകസമിതിയും സര്‍ക്കാര്‍ രൂപീകരിച്ചിട്ടുണ്ട്.

data reveals that 118 people have died due to stray dog attacks in kerala in the past decade, with victims and families often left without compensation or adequate support.