ഡെറാഡൂണ്‍: മുസ്‌ലിം കച്ചവടക്കാരനെ ആക്രമിച്ച ബജ്‌റങ് ദള്‍ പ്രവര്‍ത്തകരെ തടഞ്ഞ ദീപക് കുമാറിനെതിരെ കേസെടുത്ത് ഉത്തരാഖണ്ഡ് പൊലിസ്. വിശ്വഹിന്ദു പരിഷത്ത്, ബജ്‌റങ് ദള്‍ സംഘടനകള്‍ നല്‍കിയ പരാതിയിലാണ് പൊലിസിന്റെ നടപടി. ദീപകിന് പുറമെ വിജയ് റാവത്ത് എന്നയാള്‍ക്കെതിരെയും കേസ് രജിസ്റ്റര്‍ ചെയ്തിട്ടുണ്ട്. 

ബജ്‌റങ് ദള്‍ പ്രവര്‍ത്തകരെ ആക്രമിച്ചു, കലാപാഹ്വാനം എന്നീ വകുപ്പുകള്‍ ചുമത്തിയാണ് കേസെടുത്തത്. വിഎച്ച്പി പ്രവര്‍ത്തകനായ ഗൗരവ് കശ്പ്, ബജ്‌റങ് ദള്‍ പ്രവര്‍ത്തകനായ കമല്‍ പാല്‍ എന്നിവരാണ് യുവാക്കള്‍ക്കെതിരെ പരാതിയുമായി രംഗത്തെത്തിയതെന്നും ദ ഹിന്ദു റിപ്പോര്‍ട്ട് ചെയ്തു. കടയുടെ പേര് മാറ്റണമെന്ന് ആവശ്യപ്പെട്ട് മുസ്‌ലിം കച്ചവടക്കാരനെ ആക്രമിച്ച ബജ്‌റങ് ദള്‍ പ്രവര്‍ത്തകെ പ്രതിരോധിച്ച ദീപകിന്റെ വീഡിയോ സമൂഹ മാധ്യമങ്ങളില്‍ വൈറലായിരുന്നു. 

ALSO READ: ഭരണഘടനാ പദവിയിലിരിക്കുന്നവരുടെ വിദ്വേഷ പ്രസംഗങ്ങള്‍ക്കെതിരേ കര്‍ശന നിയമം വേണം; അസം മുഖ്യമന്ത്രിക്കെതിരേ ജംഇയ്യത്ത് സുപ്രിംകോടതിയില്‍ 

രാജ്യം റിപ്പബ്ലിക് ദിനം ആഘോഷിച്ച ജനുവരി 26നായിരുന്നു സംഭവം. സംഭവം സാമൂഹിക മാധ്യമങ്ങളില്‍ നിറഞ്ഞതോടെ ബ്ജറംഗ്ദള്‍ പ്രവര്‍ത്തകര്‍ കൂട്ടം ചേര്‍ന്ന് ദീപകിനെതിരെ ആക്രമണ ആഹ്വാനവുമായി രംഗത്തെത്തി. വിവിധ സാമൂഹിക മാധ്യമങ്ങളിലെ ഹിന്ദുത്വ പേജുകളില്‍ കൊലവിളി നിറഞ്ഞു. ഡെറാഡൂണ്‍, ഹരിദ്വാര്‍ തുടങ്ങിയ വിവിധ നഗരങ്ങളില്‍ നിന്നാണ് ഹിന്ദുത്വ പ്രവര്‍ത്തകര്‍ കൊലവിളിച്ചെത്തിയത്. ദീപകിന്റെ വീടിനു മുന്നിലും ജിംനേഷ്യം പ്രവര്‍ത്തിക്കുന്ന കെട്ടിടത്തിന് മുന്നിലും ഭീഷണി മുദ്രാവാക്യങ്ങളുമായി അവര്‍ ഒത്തുകൂടി. 

'മുഹമ്മദ് ദീപക് എന്ന് പേരുവിളിച്ചവന്‍ ജിംനേഷ്യവും പൂട്ടി ഒളിച്ചോടി. ധൈര്യമുണ്ടെങ്കില്‍ പുറത്തിറങ്ങൂ.നിരായുധരായ ബജ്റംഗ്ദള്‍ പ്രവര്‍ത്തകരെ അയാള്‍ ഓടിച്ചു. ഞങ്ങള്‍ ഇപ്പോള്‍ നിങ്ങളുടെ നാട്ടിലുണ്ട്. എന്നിട്ടും അയാള്‍ ഓടിപ്പോയി. മുസ്‌ലിംകളെ സ്‌നേഹിക്കുന്നുവെങ്കില്‍, ഒരു തൊപ്പി ധരിച്ച് മുസ്‌ലിമായിക്കോളൂ...' - വീടിനു മുന്നിലെത്തിയ ബജ്‌റങ് ദള്‍ പ്രവര്‍ത്തര്‍ ആക്രോശിച്ചു.