അബൂദബി: യുഎഇയുടെ ദേശീയ റെയില്‍വേ ശൃംഖലയായ ഇത്തിഹാദ് റെയില്‍ തങ്ങളുടെ ആദ്യ പാസഞ്ചര്‍ ട്രെയിന്‍ റൂട്ടുകള്‍ പ്രഖ്യാപിച്ചു. രാജ്യത്തിന്റെ പൊതുഗതാഗത ചരിത്രത്തിലെ വിപ്ലവകരമായ ചുവടുവെപ്പായി മാറുന്ന ഈ പദ്ധതിയില്‍, അബുദാബി, ദുബായ്, ഫുജൈറ എന്നീ എമിറേറ്റുകളെയാണ് ആദ്യ ഘട്ടത്തില്‍ ബന്ധിപ്പിക്കുന്നത്. യുഎഇയിലുടനീളമുള്ള 11 നഗരങ്ങളെയും പ്രധാന കേന്ദ്രങ്ങളെയും ബന്ധിപ്പിക്കുന്ന പദ്ധതി പൂര്‍ത്തിയാകുന്നതോടെ രാജ്യത്തെ ഗതാഗത മേഖലയില്‍ വന്‍ മാറ്റങ്ങള്‍ ദൃശ്യമാകും. ആദ്യ ഘട്ട സര്‍വീസുകള്‍ വിജയകരമാകുന്നതോടെ കൂടുതല്‍ സ്റ്റേഷനുകളും റൂട്ടുകളും ശൃംഖലയുടെ ഭാഗമാകും.

 

 

പ്രധാന റൂട്ടുകള്‍:

അബൂദബിയിലെ മുഹമ്മദ് ബിന്‍ സായിദ് സിറ്റിയെ ദുബൈയിലെ ജുമൈറ ഗോള്‍ഫ് എസ്റ്റേറ്റ്‌സ് സ്റ്റേഷനുമായാണ് ആദ്യ ഘട്ടം ബന്ധിപ്പിക്കുന്നത്. തുടര്‍ന്ന് ഈ ശൃംഖല കിഴക്കന്‍ തീരത്തെ ഫുജൈറ അല്‍ ഹിലാല്‍ സിറ്റി സ്റ്റേഷന്‍ വരെ നീളും. രാജ്യത്തെ പ്രധാന വാണിജ്യ കേന്ദ്രങ്ങളെയും വിനോദസഞ്ചാര മേഖലകളെയും പരസ്പരം ബന്ധിപ്പിക്കുന്ന തരത്തിലാണ് പാസഞ്ചര്‍ റൂട്ടുകള്‍ ക്രമീകരിച്ചിരിക്കുന്നത്.

വേഗതയും സൗകര്യങ്ങളും:
വേഗത: മണിക്കൂറില്‍ 200 കിലോമീറ്റര്‍ വേഗതയില്‍ സഞ്ചരിക്കുന്ന ട്രെയിനുകള്‍ യാത്രാസമയം ഗണ്യമായി കുറയ്ക്കും.

യാത്രാസമയം: അബുദാബിയില്‍ നിന്ന് ദുബായിലേക്ക് ഒരു മണിക്കൂറിലും, ഫുജൈറയിലേക്ക് ഏകദേശം 90 മിനിറ്റിലും എത്തിച്ചേരാനാകും.

ശേഷി: ഒരു ട്രെയിനില്‍ ഒരേസമയം 400 യാത്രക്കാര്‍ക്ക് വരെ സഞ്ചരിക്കാം. വൈഫൈ, എന്റര്‍ടൈന്‍മെന്റ് സംവിധാനങ്ങള്‍ തുടങ്ങിയ അത്യാധുനിക സൗകര്യങ്ങളും കോച്ചുകളില്‍ ഉണ്ടാകും.

സാമ്പത്തികടൂറിസം വികസനം:

ഈ വര്‍ഷം അവസാനത്തോടെ പ്രാരംഭ പ്രവര്‍ത്തനങ്ങള്‍ ആരംഭിക്കാനാണ് ഇത്തിഹാദ് റെയില്‍ ലക്ഷ്യമിടുന്നത്. റോഡ് തിരക്ക് കുറയ്ക്കുന്നതിനൊപ്പം എമിറേറ്റുകള്‍ക്കിടയിലെ ബിസിനസ് ഗതാഗതം കൂടുതല്‍ സുഗമമാക്കാന്‍ ഈ പദ്ധതി സഹായിക്കും. ഫുജൈറയിലേക്കുള്ള ട്രെയിന്‍ സര്‍വീസ് മേഖലയിലെ ടൂറിസം സാധ്യതകള്‍ക്ക് വലിയ ഊര്‍ജ്ജം പകരുമെന്നും അധികൃതര്‍ വ്യക്തമാക്കി.

ALSO READ: നാട്ടിലേക്ക് വരാനിരിക്കുകയാണോ? ഷോപ്പിങ്ങിലും ചികിത്സയിലും പ്രവാസികളെ ബാധിക്കുന്ന പ്രധാന മാറ്റങ്ങള്‍ അറിഞ്ഞിരിക്കാം | Union Budget 2026

English Summary:  UAE’s inter-city transit project, the Etihad Rail, on Monday announced the launch of the UAE’s first passenger train routes under the National Railway Network, marking a major step in the country’s public transport development.