കുണിയ: അസ്മിയുടെ നേതൃത്വത്തില്‍ സമസ്ത കിഡ്‌സ് എന്ന പേരില്‍ എ.ഐ ഇന്ററാക്ടീവ് മാഗസിന്‍ പ്രകാശനം ചെയ്തു. സമസ്ത മഹാസമ്മേളന ഉദ്ഘാടന വേളയിൽ കെ.കെ.എം അഷ്‌റഫ് എം.എല്‍.എ ഷിയാസ് അഹമ്മദ് ഹുദവിക്ക് കൈമാറി  പ്രകാശനം നിര്‍വഹിച്ചു. അസ്മിയുടെ വൗ കിഡ്‌സ് മാഗസിന്റെ സമസ്ത വേര്‍ഷനാണ് സമ്മേളന നഗരിയില്‍ പ്രകാശനം ചെയ്തത്. സമസ്ത അന്താരാഷ്ട്ര മഹാസമ്മേളനത്തിന്റെ സമ്മാനം എന്ന നിലയിലാണ് സുവനീറായി മാഗസിന്‍ പ്രകാശനം ചെയ്തത്.

കുട്ടികള്‍ക്ക് സമസ്തയെ ആശയവിനിമയത്തിലൂടെ പരിചയപ്പെടുത്തുന്നതാണ് മാഗസിന്‍. മാഗസിന്‍ ക്യൂ.ആര്‍ കോഡ് സ്‌കാന്‍ ചെയ്ത് കുട്ടികള്‍ക്ക് സംവേദനം നടത്താം എന്നതാണ് മാഗസിന്റെ പ്രത്യേകത. കുട്ടികള്‍ക്ക് ഒരു പേജ് വായിക്കുന്നതിലുപരി ആ പേജ് കാണാനും കേള്‍ക്കാനും പറയാനും ഉള്ള സൗകര്യങ്ങളാണ് മാഗസിനില്‍ ഒരുക്കിയിരിക്കുന്നത്. കുട്ടികള്‍ക്ക് കളിച്ചു പഠിക്കാം എന്നതാണ് മാഗസിന്റെ പ്രധാന സവിശേഷത. അസ്മി മാഗസിന്‍ ഇന്ററാക്ടീവായി പരിഷ്‌കരിച്ച് ഇറക്കിയത് കഴിഞ്ഞ ജനുവരിയിലാണ്. ഇതിന്റെ പ്രകാശനം കോഴിക്കോട് വച്ച് നടന്നിരുന്നു. ഇനിയുള്ള മാസങ്ങളില്‍ പുതിയ പതിപ്പുകള്‍ ലഭ്യമായി തുടങ്ങും.