തിരുവനന്തപുരം: നടന്‍ മണിയന്‍പിള്ള രാജുവിന്റെ കാറിടിച്ച് രണ്ട് പേര്‍ക്ക് പരുക്ക്. ട്രിവാന്‍ഡ്രം ക്ലബിന് മുന്നില്‍വെച്ച് ഇന്നലെ രാത്രി 10 മണിയോടെയായിരുന്നു അപകടം. കെ.എല്‍ 01 സി.ജെ 04 എന്ന നമ്പറിലുള്ള കാറാണ് അപകടമുണ്ടാക്കിയത്. നിവേദിത് കൃഷ്ണ, സൂരജ് എന്നിവര്‍ക്കാണ് പരിക്കേറ്റത്. 

മണിയന്‍ പിള്ള രാജു തന്നെയാണ് കാറോടിച്ചിരുന്നതെന്നാണ് വിവരം. അപകടശേഷം കാര്‍ നിര്‍ത്താതെ പോയെന്ന് പരാതിയുണ്ട്. പരുക്കേറ്റ രണ്ടു പേരും സ്വകാര്യ ആശുപത്രിയില്‍ ചികിത്സയിലാണ്. 

ALSO READ: വയനാട്ടിൽ കാറിന് തീപിടിച്ച് ഒരാൾ മരിച്ചു; ഭാര്യയും മൂന്ന് മക്കളും ചികിത്സയിൽ

സുധീര്‍കുമാര്‍ രാജു എന്നാണ് കാറിന്റെ ആര്‍.സി ഉടമസ്ഥന്റെ പേരെന്നാണ് ഇന്നലെ രാത്രി പൊലിസ് നല്‍കിയ വിവരം. നടന്റെ വാഹനമാണെന്നും ഡ്രൈവറായിരിക്കും വാഹനം ഓടിച്ചതെന്നും സ്ഥിരീകരിക്കാത്ത റിപ്പോര്‍ട്ടുകളുമുണ്ടായിരുന്നു. എന്നാല്‍, താന്‍ തന്നെയാണ് വാഹനം ഓടിച്ചതെന്ന് മണിയന്‍പിള്ള രാജു ഇന്ന് രാവിലെ സ്ഥിരീകരിച്ചതാതാണ് വിവരം. സുബ്രമണ്യം ഹാളിലെ ചടങ്ങില്‍ പങ്കെടുത്ത് മടങ്ങുമ്പോഴാണ് അപകടമുണ്ടായതെന്നും മണിയന്‍പിള്ള രാജു പറഞ്ഞതായും റിപ്പോര്‍ട്ടുകള്‍ വ്യക്തമാക്കുന്നു.

അപകടത്തിനു പിന്നാലെ മണിയന്‍പിള്ള രാജുവിന്റെ ഫോണ്‍ സ്വിച്ച് ഓഫ് ചെയ്ത നിലയിലായിരുന്നു. പൊലിസ് കഴിഞ്ഞ ദിവസം രാത്രി തന്നെ മണിയന്‍പിള്ള രാജുവിനെ അന്വേഷിച്ചെത്തി എന്നാല്‍ കണ്ടെത്താന്‍ കഴിഞ്ഞിരുന്നില്ല. 

അതേസമയം, താന്‍ ഇന്ന് പൊലിസിന് മുമ്പാകെ ഹാജരാകുമെന്ന് നടന്‍ അറിയിച്ചു. വാഹനമോടിക്കുമ്പോള്‍ മദ്യപിച്ചിരുന്നില്ലെന്നും ബൈക്ക് തന്റെ കാറിന് പിന്നില്‍ ഇടിക്കുകയായിരുന്നുവെന്നുമാണ് അദ്ദേഹം പറയുന്നത്.

two people were injured after actor maniyanpilla raju’s car allegedly hit them and fled the scene, according to a complaint filed.