കുണിയ: അക്രമാസക്തരായ ആള്‍ക്കൂട്ടം നടത്തുന്ന നിയമവിരുദ്ധ വിചാരണകളും കൊലപാതകങ്ങളും വര്‍ധിച്ചുവരുന്ന സാഹചര്യത്തില്‍ കേന്ദ്ര, സംസ്ഥാന സര്‍ക്കാരുകള്‍ മാതൃകാപരമായ ശിക്ഷ ഉറപ്പുവരുത്തുന്ന പ്രത്യേക നിയമം കൊണ്ടുവരണമെന്ന് സമസ്ത ശതാബ്ദി അന്താരാഷ്ട്ര മഹാസമ്മേളനം പ്രമേയത്തില്‍ ആവശ്യപ്പെട്ടു. 

മതസ്വാതന്ത്ര്യം അനുവദിക്കുകയും പൗരന്മാര്‍ക്കിടയില്‍ മതത്തിന്റെ പേരില്‍ വിവേചനം പാടില്ലെന്ന് പറയുകയും ചെയ്യുന്ന ഭരണഘടനയുടെ 25, 15 വകുപ്പുകള്‍ ഉള്‍പ്പെടെയുള്ള രാജ്യത്തിന്റെ നിയമവ്യവസ്ഥകളെയും ജനാധിപത്യ നടപടിക്രമങ്ങളെയും നോക്കുകുത്തിയാക്കിയാണ് ആള്‍ക്കൂട്ട ആക്രമണം.  

പൗരന്മാര്‍ക്ക് സമാധാനാന്തരീക്ഷത്തില്‍ ജീവിക്കാനും ആശയപ്രചരണം നടത്താനും പ്രയാസം നേരിടുകയാണെന്നും പ്രമേയം ആവശ്യപ്പെട്ടു. കേന്ദ്ര മുശാവറ അംഗങ്ങളായ ബഷീര്‍ അബ്ദുല്ല ഫൈസി ചീക്കോന്ന് അവതാരകനും അബ്ദുല്‍ ഗഫൂര്‍ അന്‍വരി അനുവാദകനുമായാണ് പ്രമേയം അവതരിപ്പിച്ചത്.