മനാമ: 2025 സാമ്പത്തിക വര്‍ഷം ബഹ്‌റൈന്‍ അന്താരാഷ്ട്ര വിമാനത്താവളത്തിന് റെക്കോര്‍ഡ് നേട്ടങ്ങളുടെ വര്‍ഷമായി. ഈ കാലയളവില്‍ 9.74 ദശലക്ഷം യാത്രക്കാര്‍ വിമാനത്താവളം ഉപയോഗിച്ചതായി ബഹ്‌റൈന്‍ എയര്‍പോര്‍ട്ട് കമ്പനി അറിയിച്ചു. 2024ലെ 9.35 ദശലക്ഷം യാത്രക്കാരുമായി താരതമ്യം ചെയ്യുമ്പോള്‍ 4.2 ശതമാനം വര്‍ധനവാണ് രേഖപ്പെടുത്തിയത്.

യാത്രക്കാരുടെ എണ്ണത്തിനൊപ്പം വിമാന ചരക്കുഗതാഗതത്തിലും ശ്രദ്ധേയമായ മുന്നേറ്റമാണ് ഉണ്ടായത്. 2025ല്‍ 4,05,217 മെട്രിക് ടണ്‍ ചരക്കുകള്‍ കൈകാര്യം ചെയ്തു. ഇത് മുന്‍വര്‍ഷത്തേക്കാള്‍ 3.2 ശതമാനം കൂടുതലാണെന്ന് അധികൃതര്‍ വ്യക്തമാക്കി. ഇതോടെ മേഖലയില്‍ പ്രധാന ചരക്കു ഗതാഗത കേന്ദ്രമായി ബഹ്‌റൈന്‍ അന്താരാഷ്ട്ര വിമാനത്താവളം കൂടുതല്‍ ശക്തമായി നിലകൊള്ളുന്നു.

വര്‍ഷം മുഴുവന്‍ 97,740 വിമാനങ്ങളുടെ ലാന്‍ഡിങ്-ടേക്ക് ഓഫ് നടപടികളും വിമാനത്താവളത്തില്‍ നടന്നു. ഉയര്‍ന്ന യാത്രക്കാരും സര്‍വീസുകളും കാര്യക്ഷമമായി കൈകാര്യം ചെയ്യാന്‍ വിമാനത്താവളത്തിന് കഴിഞ്ഞതായും കമ്പനി അറിയിച്ചു.

ALSO READ: ഒറ്റ വിസയിൽ 6 ഗൾഫ് രാജ്യങ്ങൾ! ജിസിസി ഏകീകൃത വിസ വരുന്നു; എങ്ങനെ അപേക്ഷിക്കാം?

നിലവില്‍ ആറ് ഭൂഖണ്ഡങ്ങളിലായി 74 രാജ്യങ്ങളിലെ ലക്ഷ്യസ്ഥാനങ്ങളിലേക്ക് ബഹ്‌റൈന്‍ അന്താരാഷ്ട്ര വിമാനത്താവളം സര്‍വീസ് നല്‍കുന്നു. 39 എയര്‍ലൈന്‍ കമ്പനികളാണ് ഇവിടെ പ്രവര്‍ത്തിക്കുന്നത്. 2025ല്‍ നെറ്റ്‌വര്‍ക്ക് വികസനത്തിന്റെ ഭാഗമായി ലണ്ടന്‍ ഗാറ്റ്‌വിക്, നെറോബി, ന്യൂയോര്‍ക്ക്, ബുക്കറസ്റ്റ്, അഷ്ടഗബാദ്, ലീജ് എന്നിവിടങ്ങളിലേക്ക് പുതിയ സര്‍വീസുകള്‍ ആരംഭിച്ചു.

അതേസമയം സിംഗപ്പൂര്‍, ബെംഗളൂരു, അബുദാബി, നജാഫ്, ഷാര്‍ജ തുടങ്ങിയ റൂട്ടുകളില്‍ യാത്രക്കാരുടെ എണ്ണത്തില്‍ വലിയ വര്‍ധനവുണ്ടായതായും റിപ്പോര്‍ട്ടില്‍ വ്യക്തമാക്കുന്നു.

യാത്രക്കാരുടെയും ചരക്കുഗതാഗതത്തിന്റെയും തുടര്‍ച്ചയായ വര്‍ധന, വിമാന സര്‍വീസുകളും വിമാനത്താവള പ്രവര്‍ത്തനങ്ങളും ഉള്‍പ്പെടുന്ന ബഹ്‌റൈന്റെ വിമാനയാന മേഖലയിലെ മുന്നേറ്റവും രാജ്യത്തിന്റെ ആഗോള ബന്ധങ്ങള്‍ കൂടുതല്‍ ശക്തമാകുന്നതും വ്യക്തമാക്കുന്നതാണെന്ന് അധികൃതര്‍ പറഞ്ഞു. 

Bahrain International Airport recorded a historic performance in 2025, handling 9.74 million passengers and over 405,000 metric tonnes of cargo, marking strong growth in passenger and cargo traffic.