തൃശൂര്‍: ജില്ലാ ടൂറിസം വകുപ്പും ടൂറിസം പ്രൊമോഷന്‍ കൗണ്‍സിലും ജില്ലാ ഭരണകൂടവും തൃശൂര്‍ കോര്‍പറേഷനും സംയുക്തമായി സംഘടിപ്പിക്കുന്ന ഓണാഘോഷ പരിപാടികള്‍ 13 മുതല്‍ 17 വരെ വിവിധ കേന്ദ്രങ്ങളിലായി സംഘടിപ്പിക്കും. 13ന് തേക്കിന്‍കാട് മൈതാനിയില്‍ സി.എം.എസ് സ്‌കൂളിന് എതിര്‍വശത്തായി പ്രത്യേകം സജ്ജമാക്കുന്ന വേദിയില്‍ വിവിധ കലാപരിപാടികള്‍ നടക്കും. വൈകിട്ട് തേക്കിന്‍കാട് മൈതാനിയില്‍ നടക്കുന്ന ചടങ്ങില്‍ സഹകരണ വകുപ്പുമന്ത്രി എ.സി മൊയ്തീന്‍ ഓണാഘോഷ പരിപാടികളുടെ ഔദ്യോഗിക ഉദ്ഘാടനം നിര്‍വഹിക്കും.
മന്ത്രി വി.എസ് സുനില്‍കുമാര്‍ അധ്യക്ഷനാകും. ഉമ്പായിയുടെ ഗസല്‍ സന്ധ്യ, നാടന്‍ കലകളുടെ ദൃശ്യാവിഷ്‌കാരം, കളരിപ്പയറ്റ്, നാടകം, സിനിമാ താരം ഡോ. സ്വാതി നാരായണന്റെ കുച്ചുപ്പുടി, ഹരിശ്രീ അശോകനും സംഘവും അവതരിപ്പിക്കുന്ന കോമഡി ക്വട്ടേഷന്‍ ഷോ, കഥകളി, ഇന്‍സ്ട്രുമെന്റല്‍ ഗാനമേള. രഞ്ജിനി ജോസ് നയിക്കുന്ന ഗാനമേള, നൃത്തനൃത്യങ്ങള്‍, പുലിക്കളി, കലാസന്ധ്യ എന്നിവ ഓണാഘോഷ പരിപാടികള്‍ക്ക് കൊഴുപ്പ് കൂട്ടും. സമാപന സമ്മേളനം വിദ്യാഭ്യാസ മന്ത്രി പ്രൊഫ. സി.രവീന്ദ്രനാഥ് ഉദ്ഘാടനം ചെയ്യും. മേയര്‍ അജിതാ ജയരാജന്‍ അധ്യക്ഷയാകും. വാര്‍ത്താ സമ്മേളനത്തില്‍ ജില്ലാ കലക്ടര്‍ ഡോ. എ.കൗശിഗന്‍, കോര്‍പറേഷന്‍ ഡെപ്യൂട്ടി മേയര്‍ വര്‍ഗീസ് കണ്ടംകുളത്തി, ഡി.ടി. പി.സി സെക്രട്ടറി എം.വി കുഞ്ഞിരാമന്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.