മസ്‌കത്ത്: ഒമാനിലെ സ്വകാര്യ കമ്പനികള്‍ കയറ്റുമതി രംഗത്ത് വലിയ നേട്ടം കൈവരിച്ചു. 2024-25 കാലയളവില്‍ 200 ഒമാനി കമ്പനികള്‍ അന്താരാഷ്ട്ര വിപണികളിലേക്ക് ഉല്‍പ്പന്നങ്ങള്‍ കയറ്റുമതി ചെയ്തു, ഇതിലൂടെ 500 മില്യണ്‍ ഒമാനി റിയാല്‍ മൂല്യമുള്ള കയറ്റുമതിയാണ് രാജ്യത്തിന് നേടാനായത്.

സര്‍ക്കാരും സ്വകാര്യ കമ്പനികളും ഒരുമിച്ച് പങ്കെടുക്കുന്ന 'ടുഗെദര്‍ ഫോര്‍വേഡ്' ഫോറത്തിലാണ് ഈ കണക്കുകള്‍ അവതരിപ്പിച്ചത്. എണ്ണയില്‍ മാത്രം ആശ്രിയിക്കാതെ, രാജ്യത്തിന്റെ സാമ്പത്തിക അടിത്തറ ശക്തിപ്പെടുത്തുകയെന്ന ലക്ഷ്യത്തോടെയുള്ള ദേശീയ നയങ്ങളുടെ ഭാഗമായാണ് കയറ്റുമതി മേഖലയ്ക്ക് കൂടുതല്‍ പ്രാധാന്യം നല്‍കുന്നത്.

വ്യവസായ ഉല്‍പ്പന്നങ്ങള്‍, ഭക്ഷ്യവസ്തുക്കള്‍, നിര്‍മ്മിത ഉല്‍പ്പന്നങ്ങള്‍ ഉള്‍പ്പെടെ വിവിധ മേഖലകളില്‍ നിന്നുള്ള കമ്പനികളാണ് ആഗോള വിപണിയില്‍ ഒമാന്റെ സാന്നിധ്യം ഉറപ്പിച്ചത്. ഇതുവഴി ഒമാനി ഉല്‍പ്പന്നങ്ങളുടെ ഗുണനിലവാരവും മത്സരക്ഷമതയും അന്താരാഷ്ട്ര തലത്തില്‍ അംഗീകരിക്കപ്പെടുന്നതായും ഫോറത്തില്‍ വിലയിരുത്തപ്പെട്ടു.

സ്വകാര്യ മേഖലയെ കൂടുതല്‍ ശക്തിപ്പെടുത്തുന്നതിനായി കയറ്റുമതി പ്രോത്സാഹന പദ്ധതികള്‍, നിക്ഷേപ സൗകര്യങ്ങള്‍, വിപണി പ്രവേശന സഹായങ്ങള്‍ എന്നിവ സര്‍ക്കാര്‍ തുടര്‍ന്നും വിപുലീകരിക്കുമെന്ന് ബന്ധപ്പെട്ട അധികൃതര്‍ അറിയിച്ചു. ചെറുകിട-ഇടത്തരം സ്ഥാപനങ്ങള്‍ക്ക് ആഗോള വിപണിയിലെത്താന്‍ കൂടുതല്‍ അവസരങ്ങള്‍ സൃഷ്ടിക്കാനും പദ്ധതിയിടുന്നതായി അറിയിച്ചു.

ഒമാന്‍ വിഷന്‍ 2040ന്റെ ഭാഗമായി, എണ്ണേതര വരുമാനം വര്‍ധിപ്പിക്കുകയും സുസ്ഥിര സാമ്പത്തിക വളര്‍ച്ച കൈവരിക്കുകയുമാണ് രാജ്യത്തിന്റെ പ്രധാന ലക്ഷ്യം. കയറ്റുമതി മേഖലയിലെ ഈ മുന്നേറ്റം, ഒമാന്റെ സാമ്പത്തിക ഭാവിയിലേക്കുള്ള ആത്മവിശ്വാസം വര്‍ധിപ്പിക്കുന്നതാണെന്ന് സാമ്പത്തിക വിദഗ്ധര്‍ ചൂണ്ടിക്കാട്ടുന്നു.

Around 200 Omani companies exported products worth 500 million Omani rials during 2024–25, highlighting Oman’s growing non-oil economy and private sector strength, officials said at the Together Forward Forum.