അബുദബി: റോഡ് സുരക്ഷ വർദ്ധിപ്പിക്കുന്നതിന്റെയും അപകടങ്ങൾ കുറയ്ക്കുന്നതിന്റെയും ഭാഗമായി അബുദബിയിലെ മൂന്ന് പ്രധാന റോഡുകളിൽ വേഗപരിധി കുറച്ചു. എമിറേറ്റിലെ സംയുക്ത ഗതാഗത സുരക്ഷാ സമിതിയുടേതാണ് തീരുമാനം. ഇന്ന് ഉച്ചയ്ക്ക് 12 മണി മുതൽ പുതിയ വേഗപരിധി പ്രാബല്യത്തിൽ വന്നു.

അബുദബി - അൽ ഐൻ റോഡ് (E22): അൽ നഹ്ദ ഇന്റർചേഞ്ചിനും ബനിയാസ് ഇന്റർചേഞ്ചിനും ഇടയിലുള്ള വേഗപരിധി മണിക്കൂറിൽ 160 കിലോമീറ്ററിൽ നിന്ന് 140 കിലോമീറ്ററായി കുറച്ചു.

സായിദ് സിറ്റി - മുഹമ്മദ് ബിൻ സായിദ് സിറ്റി (E22 ഭാഗം): ബനിയാസ് ഇന്റർചേഞ്ച് മുതൽ ബ്രിഡ്ജസ് കോംപ്ലക്‌സ് വരെയുള്ള ഭാഗത്ത് വേഗപരിധി മണിക്കൂറിൽ 140 കിലോമീറ്ററിൽ നിന്ന് 120 കിലോമീറ്ററായി കുറച്ചു.

അൽ റൗദ റോഡ് (E30): മുസഫയെ മുഹമ്മദ് ബിൻ സായിദ് സിറ്റിയുമായി ബന്ധിപ്പിക്കുന്ന ഈ റോഡിൽ മണിക്കൂറിൽ 120 കിലോമീറ്ററിൽ നിന്ന് 100 കിലോമീറ്ററായി വേഗത കുറച്ചു.

പുതിയ നിയമം നടപ്പിലാക്കുന്നതിന്റെ ഭാഗമായി ഈ റോഡുകളിലെ സ്പീഡ് സൈൻ ബോർഡുകൾ മാറ്റുന്നതിനും റഡാർ സംവിധാനങ്ങൾ പുതുക്കിയ വേഗതയ്ക്കനുസരിച്ച് ക്രമീകരിക്കുന്നതിനുമുള്ള നടപടികൾ അധികൃതർ പൂർത്തിയാക്കി. ഇരു ദിശകളിലേക്കുമുള്ള വാഹനങ്ങൾക്കും ഈ മാറ്റം ബാധകമാണ്.

റോഡ് ഉപയോക്താക്കളുടെ സുരക്ഷ മുൻനിർത്തി വാഹനമോടിക്കുന്നവർ പുതിയ വേഗപരിധി കർശനമായി പാലിക്കണമെന്ന് ഗതാഗത സുരക്ഷാ സമിതി അഭ്യർത്ഥിച്ചു. നിയമലംഘനം നടത്തുന്നവർക്കെതിരെ കർശന നടപടിയുണ്ടാകുമെന്നും അധികൃതർ മുന്നറിയിപ്പ് നൽകി.

abu dhabi authorities have reduced speed limits on three key roads to improve traffic safety and reduce accidents. motorists are advised to follow the updated limits to avoid fines and ensure smoother traffic flow.