ന്യൂഡൽഹി: രാജ്യത്തെ ഒരു സംസ്ഥാനത്തും വോട്ടർപട്ടിക സമഗ്ര പരിഷ്കരണ പ്രക്രിയ (SIR) തടസ്സപ്പെടുത്താൻ അനുവദിക്കില്ലെന്ന് സുപ്രീംകോടതി. നടപടികൾ സുഗമമായി പൂർത്തിയാക്കാൻ ആവശ്യമായ ഇടക്കാല ഉത്തരവുകളും നിർദ്ദേശങ്ങളും കോടതി പുറപ്പെടുവിക്കുമെന്നും ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് വ്യക്തമാക്കി. പശ്ചിമ ബംഗാളിലെ വോട്ടർപട്ടിക പരിഷ്കരണത്തിലെ ക്രമക്കേടുകൾ ആരോപിച്ചുള്ള ഹർജികൾ പരിഗണിക്കവെയാണ് കോടതിയുടെ സുപ്രധാന ഇടപെടൽ.

ബംഗാളിൽ സമയം നീട്ടി നൽകി

പശ്ചിമ ബംഗാളിലെ വോട്ടർപട്ടിക പരിഷ്കരണവുമായി ബന്ധപ്പെട്ട രേഖകളുടെ സൂക്ഷ്മ പരിശോധന പൂർത്തിയാക്കാൻ കോടതി ഒരാഴ്ച കൂടി സമയം അനുവദിച്ചു. മുഖ്യമന്ത്രി മമതാ ബാനർജിയുടെ ആവശ്യം പരിഗണിച്ചാണ് ഈ നടപടി. കൃത്യമായ പരിശോധന ഉറപ്പാക്കുന്നതിനൊപ്പം പ്രക്രിയ വൈകിപ്പിക്കാൻ ആരെയും അനുവദിക്കില്ലെന്ന് കോടതി ഉറപ്പിച്ചു പറഞ്ഞു.

സുപ്രധാന നിർദ്ദേശങ്ങൾ:

വോട്ടർപട്ടിക പുതുക്കുന്നതിൽ രാഷ്ട്രീയമോ ഭരണപരമോ ആയ തടസ്സങ്ങൾ ഉണ്ടായാൽ കോടതി കർശനമായി ഇടപെടും.ബംഗാളിൽ തിരഞ്ഞെടുപ്പ് കമ്മീഷൻ ഉദ്യോഗസ്ഥർക്കെതിരെ നടന്ന ആക്രമണങ്ങളിൽ സുപ്രീംകോടതി ആശങ്ക രേഖപ്പെടുത്തി. അക്രമ സംഭവങ്ങളിൽ എന്ത് നടപടി സ്വീകരിച്ചുവെന്ന് വിശദീകരിക്കാൻ ബംഗാൾ ഡിജിപിക്ക് കോടതി നിർദ്ദേശം നൽകി.

കമ്മീഷന്റെ പരാതി: 

ഉദ്യോഗസ്ഥർക്ക് നേരെ അക്രമം ഉണ്ടായിട്ടും സംസ്ഥാന പോലീസ് നടപടിയെടുക്കുന്നില്ലെന്ന തിരഞ്ഞെടുപ്പ് കമ്മീഷന്റെ അപേക്ഷയിലാണ് കോടതി വിശദീകരണം തേടിയത്.ജനാധിപത്യ പ്രക്രിയയുടെ അടിത്തറയായ വോട്ടർപട്ടിക കുറ്റമറ്റതാക്കാൻ എല്ലാ സംസ്ഥാന സർക്കാരുകളും തിരഞ്ഞെടുപ്പ് കമ്മീഷനുമായി പൂർണ്ണമായും സഹകരിക്കണമെന്ന് കോടതി ഓർമ്മിപ്പിച്ചു.