മുംബൈ: സ്പാനിഷ നിര്‍മിത അതിവേഗ ടാല്‍ഗോ ട്രെയിനിന്റെ അവസാനഘട്ട പരീക്ഷണ ഓട്ടവും വിജയകരമായി പൂര്‍ത്തിയാക്കി. ഡല്‍ഹിയില്‍ നിന്നും മുംബൈയിലേക്ക് 12 മണിക്കൂറില്‍ താഴെ യാത്ര പൂര്‍ത്തിയാക്കമെന്ന ലക്ഷ്യവും ടാല്‍ഗോ ട്രെയിന്‍ പൂര്‍ത്തീകരിച്ചു. ഡല്‍ഹിയില്‍ നിന്ന് ഇന്നലെ ഉച്ചക്ക് 2.45ന് പുറപ്പെട്ട ട്രെയിന്‍ ഇന്ന് പുലര്‍ച്ചെ 2.34ന് മുംബൈയിലെത്തി.

ഡല്‍ഹി-മുംബൈ യാത്രയില്‍ 4 മണിക്കൂര്‍ സമയം വെട്ടിചുരുക്കാനുള്ള ഇന്ത്യന്‍ റെയില്‍വെയുടെ ശ്രമവും ഫലം കണ്ടു. 9 സൂപ്പര്‍ ലൈറ്റ് വെയ്റ്റ് കോച്ചുകളാണ് ടാല്‍ഗോ ട്രെയിനുള്ളത്. കഴിഞ്ഞ ഏപ്രിലിലാണ് സ്‌പെയിനില്‍ നിന്ന് കോച്ചുകള്‍ മുംബൈയിലെത്തിച്ചത്. 200കിലോമീറ്റര്‍ വേഗത കൈവരിക്കാന്‍ ടാല്‍ഗോ ട്രെയിനിന് കഴിയും.

ഡല്‍ഹിയില്‍ നിന്നും മുംബൈയിലേക്കുള്ള ദൂരം 1400 കിലോമീറ്ററാണ്. നിലവില്‍ രാജധാനി എക്‌സ്പ്രസ 16 മണിക്കൂറെടുത്താണ് യാത്ര പൂര്‍ത്തിയാക്കുന്നത്. രണ്ട് എക്‌സിക്യൂട്ടിവ് ക്ലാസും, നാല് ചെയര്‍ കാര്‍സും ഒരു കഫേറ്റീരിയയും പവര്‍കാറും ടെയ്ല്‍ എന്‍ഡുമാണ് ടാല്‍ഗോയിലുള്ളത്.