മസ്‌കത്ത്: രാജ്യത്തെ ചില റെസ്റ്റോറന്റുകള്‍ക്കും കഫേകള്‍ക്കും ടൂറിസം ക്ലാസിഫിക്കേഷന്‍ നിര്‍ബന്ധമാക്കി പുതിയ നിര്‍ദേശം. 'മിനിസ്ട്രി ഓഫ് ഹെരിറ്റേജ് ആന്റ് ടൂറിസം' അറിയിച്ചതനുസരിച്ച്, ഹോട്ടലുകള്‍ക്കുള്ളില്‍ പ്രവര്‍ത്തിക്കുന്ന ഭക്ഷണശാലകള്‍, ടൂറിസം ഉപയോഗത്തിനായി അനുവദിച്ച സ്ഥലത്തിലെ ഔട്ട്‌ലെറ്റുകള്‍, പ്രാദേശികവും അന്താരാഷ്ട്രവുമായ ഫ്രാഞ്ചൈസി ബ്രാന്‍ഡുകള്‍ക്ക് കീഴില്‍ പ്രവര്‍ത്തിക്കുന്ന കഫേകള്‍ എന്നിവയ്ക്ക് ഇനി ക്ലാസിഫിക്കേഷന്‍ സര്‍ട്ടിഫിക്കറ്റ് ആവശ്യമാണ്.

ഈ വിഭാഗത്തില്‍പ്പെടുന്ന സ്ഥാപനങ്ങള്‍ മന്ത്രാലയത്തിന്റെ ഓണ്‍ലൈന്‍ സേവന സംവിധാനം വഴി അപേക്ഷ സമര്‍പ്പിക്കണം. നിര്‍ദ്ദിഷ്ട മാനദണ്ഡങ്ങള്‍ പാലിച്ച ശേഷമേ സര്‍ട്ടിഫിക്കറ്റ് അനുവദിക്കുകയുളളു. സേവന നിലവാരം, സൗകര്യങ്ങള്‍, ശുചിത്വം, സുരക്ഷാ ക്രമീകരണങ്ങള്‍ തുടങ്ങിയ ഘടകങ്ങളാണ് വിലയിരുത്തലിന്റെ അടിസ്ഥാനമായി കണക്കാക്കുന്നത്.

ALSO READ: ഒമാനില്‍ സ്വദേശിവത്ക്കരണത്തിന് പ്രോത്സാഹനം; പെര്‍മിറ്റില്‍ 30% കുറവ്

നിര്‍ബന്ധിത പട്ടികയില്‍ ഉള്‍പ്പെടാത്ത മറ്റ് റെസ്റ്റോറന്റുകള്‍ക്കും കഫേകള്‍ക്കും താല്‍പര്യമുണ്ടെങ്കില്‍ സ്വമേധയാ ക്ലാസിഫിക്കേഷന്‍ നേടാം. ടൂറിസം മേഖലയിലെ സേവന നിലവാരം ഏകീകരിക്കാനും സന്ദര്‍ശകര്‍ക്ക് ഗുണമേന്മയുള്ള അനുഭവം ഉറപ്പാക്കാനുമുള്ള നീക്കത്തിന്റെ ഭാഗമായാണ് ഈ നടപടി.

രാജ്യത്തെ ഭക്ഷ്യ-പാനീയ മേഖലയെ കൂടുതല്‍ ക്രമീകരിച്ച് ടൂറിസം രംഗത്തെ നിലവാരം ഉയര്‍ത്തുകയാണ് ലക്ഷ്യമെന്ന് അധികൃതര്‍ വ്യക്തമാക്കി. ഒമാന്‍ ടൂറിസം വികസന തന്ത്രത്തിന്റെ ഭാഗമായാണ് പുതിയ നിര്‍ദേശം നടപ്പിലാക്കുന്നത്.

Oman mandates tourism classification for select restaurants and cafes, including hotel-based outlets and franchise establishments, as part of efforts to standardise service quality and strengthen the tourism sector.