ഹൈദരാബാദ്: ടി20 ലോകകപ്പിനിടെ കാര്യമായ മാറ്റവുമായി ഓസ്ട്രേലിയ. പരുക്ക് കാരണം പുറത്തായിരുന്ന ഫാസ്റ്റ് ബൗളർ ജോഷ് ഹേസൽവുഡിന് പകരം സ്റ്റീവ് സ്മിത്തിനെ ഓസ്ട്രേലിയൻ ടീമിൽ ഉൾപ്പെടുത്തി. കാലിനേറ്റ പരുക്കിൽ നിന്ന് ഹേസൽവുഡിന് പൂർണമായി മുക്തനാകാൻ കഴിയാത്ത സാഹചര്യത്തിലാണ് സ്മിത്തിനെ ടീമിലെത്തിച്ചത്. ശ്രീലങ്കക്കെതിരായ നിർണായക മത്സരത്തിന് മണിക്കൂറുകൾക്ക് മുമ്പാണ് ഓസീസ് പുതിയ തീരുമാനം പ്രഖ്യാപിച്ചത്. 

ജോഷ് ഹേസിൽവുഡിനെ നേരത്തെ ഓസ്ട്രേലിയയുടെ ടി20 ലോകകപ്പ് ടീമിൽ ഉൾപ്പെടുത്തിയിരുന്നു, എന്നാൽ പരുക്കിനെ തുടർന്ന് അദ്ദേഹം പരമ്പരയിൽ നിന്ന് പിന്മാറിയതായി ക്രിക്കറ്റ് ഓസ്ട്രേലിയ അറിയിച്ചു. അദ്ദേഹത്തിന് പകരക്കാരനെ ഇതുവരെ പ്രഖ്യാപിക്കാതിരുന്ന ക്രിക്കറ്റ് ഓസ്ത്രേലിയ ഇപ്പോൾ സ്മിത്തിനെ പകരക്കാരനായി പ്രഖ്യാപിക്കുകയായിരുന്നു.

2010 ൽ ഓസ്ട്രേലിയൻ ടി20 ടീമിനായി അരങ്ങേറ്റം കുറിച്ച സ്മിത്ത് ഇതുവരെ 67 ടി20 മത്സരങ്ങൾ കളിക്കുകയും 5 അർദ്ധ സെഞ്ചുറികൾ ഉൾപ്പെടെ 1,094 റൺസ് നേടുകയും ചെയ്തിട്ടുണ്ട്. 2024 ലാണ് അദ്ദേഹം അവസാന മായി അന്താരാഷ്ട്ര ടി20 ക്രിക്കറ്റ് കളിച്ചത്. അടുത്തിടെ സമാപിച്ച ബിഗ് ബാഷ് ലീഗിലും മികച്ച പ്രകടനം കാഴ്ചവച്ച താരം വെറും 6 ഇന്നിംഗ്‌സുകളിൽ നിന്ന് 300ൽ അധികം റൺസ് നേടിയിരുന്നു.