തിരുവനന്തപുരം: കേരള ഗവണ്‍മെന്റ് മെഡിക്കല്‍ കോളജ് ടീച്ചേഴ്‌സ് അസോസിയേഷൻ്റെ  (കെ.ജി.എം.സി.ടി.എ) നേതൃത്വത്തില്‍ മെഡിക്കല്‍ കോളജ് ഡോക്ടര്‍മാരുടെ അനിശ്ചിതകാല സമരം കൂടുതല്‍ ശക്തമാക്കുന്നു. ഇന്നുമുതല്‍ അടിയന്തരമല്ലാത്ത ശസ്ത്രക്രിയ നടപടികളില്‍ നിന്നും ഡോക്ടര്‍മാര്‍ വിട്ടുനില്‍ക്കും. 26 മുതല്‍ എല്ലാ പരീക്ഷാ ജോലികളില്‍ നിന്നും സംഘടന വിട്ടുനില്‍ക്കുമെന്നും സംസ്ഥാന പ്രസിഡന്റ് ഡോ. റോസ്‌നാരാ ബീഗം.ടി, ജനറല്‍ സെക്രട്ടറി ഡോ. അരവിന്ദ് സി.എസ്. എന്നിവര്‍ അറിയിച്ചു. 

സമരത്തെ തുടര്‍ന്ന് ഒ.പി.കളില്‍ സീനിയര്‍ ഡോക്ടര്‍മാര്‍ ഇന്നലെയും എത്തിയില്ല. പി.ജി. വിദ്യാർഥികളും ഹൗസ് സര്‍ജന്‍മാരുമാണ്  രോഗികളെ പരിശോധിച്ചത്. വിദ്യാർഥികളുടെ പഠനവും മുടങ്ങി. അവശ്യ ആരോഗ്യ സേവനങ്ങളായ അത്യാഹിത വിഭാഗം, ലേബര്‍ റൂം, അടിയന്തര ശസ്ത്രക്രിയകള്‍, ഐ.സി.യു, പോസ്റ്റ്‌മോര്‍ട്ടം പരിശോധനകള്‍, അടിയന്തര ലബോറട്ടറി സേവനങ്ങള്‍ എന്നിവയെ സമരത്തില്‍ നിന്ന് ഒഴിവാക്കിയിട്ടുണ്ട്. 

അന്യായമായി തടഞ്ഞുവച്ചിരിക്കുന്ന ശമ്പളപരിഷ്‌കരണ കുടിശ്ശിക ഉടന്‍ നല്‍കുക,  മതിയായ അടിസ്ഥാന സൗകര്യങ്ങള്‍ സൃഷ്ടിക്കുക തുടങ്ങിയ വിവിധ ആവശ്യങ്ങള്‍ ഉന്നയിച്ചാണ് സമരം തുടരുന്നത്.