കൊച്ചി :  സ്പാര്‍ക് പോര്‍ട്ടലിലെ ഡാറ്റ ദുരുപയോഗം സംബന്ധിച്ച ഹൈക്കോടതിയുടെ കടുത്ത വിമര്‍ശനം മുഖ്യമന്ത്രിയുടെ ഓഫീസിനെതിരായ ഗുരുതരമായ കുറ്റപത്രമാണെന്ന് കെ.സി. വേണുഗോപാല്‍ പറഞ്ഞു. സര്‍ക്കാര്‍ ജീവനക്കാരുടെയും അധ്യാപകരുടെയും വ്യക്തിഗത വിവരങ്ങള്‍ രാഷ്ട്രീയ പ്രചാരണത്തിനായി ഉപയോഗിച്ചത് പ്രഥമദൃഷ്ട്യാ സ്വകാര്യത ലംഘനമാണെന്ന കോടതിയുടെ നിരീക്ഷണം സര്‍ക്കാരിന്റെ ഭരണനൈതികതയെ ചോദ്യം ചെയ്യുന്നതാണെന്നും അദ്ദേഹം വ്യക്തമാക്കി.

സ്വകാര്യ ആവശ്യങ്ങള്‍ക്ക് മാത്രം നല്‍കിയ ഡാറ്റ എങ്ങനെ രാഷ്ട്രീയ സന്ദേശങ്ങള്‍ അയയ്ക്കാന്‍ ഉപയോഗിച്ചുവെന്ന ചോദ്യത്തിന് സര്‍ക്കാര്‍ ഇതുവരെ മറുപടി നല്‍കിയിട്ടില്ല. 'ഗുണഭോക്താക്കള്‍ക്കാണ് സന്ദേശങ്ങള്‍ അയച്ചത്' എന്ന സര്‍ക്കാര്‍ വാദം കോടതി തള്ളിയത് തന്നെ ആരോപണങ്ങളുടെ ഗൗരവം വ്യക്തമാക്കുന്നതാണ്്.. ഗുണഫലമൊന്നും ലഭിക്കാത്തവര്‍ക്കും സന്ദേശങ്ങള്‍ ലഭിച്ചതായി കോടതി ചൂണ്ടിക്കാട്ടിയതോടെ ഡാറ്റ സുരക്ഷ പൂര്‍ണമായി പരാജയപ്പെട്ടുവെന്നതും തെളിയുന്നു. സ്പ്രിങ്ക്‌ലര്‍ സംഭവത്തിന് ശേഷം വീണ്ടും ഒരു ഡാറ്റ മോഷണ ആരോപണം ഉയരുന്നത് ആശങ്കാജനകമാണെന്നും, ബഹുമാനത്തോടെ 'ഓണറബിള്‍ ചീഫ് മിനിസ്റ്റര്‍' എന്ന് വിളിച്ച ആളെ ഇനി 'തീഫ് മിനിസ്റ്റര്‍' എന്ന് വിളിക്കേണ്ട അവസ്ഥയിലേക്കാണ് കാര്യങ്ങള്‍ നീങ്ങുന്നതെന്നും അദ്ദേഹം വിമര്‍ശിച്ചു. സ്വന്തം ജീവനക്കാരുടെ ഡാറ്റ പോലും സുരക്ഷിതമല്ലാത്ത സര്‍ക്കാരാണ് സംസ്ഥാനത്തെ സംരക്ഷിക്കുമെന്ന് പറയുന്നത്. വ്യക്തിഗത ഡാറ്റ ശേഖരിച്ച ഉദ്ദേശ്യത്തിനുള്ളില്‍ മാത്രം ഉപയോഗിക്കണമെന്ന നിയമതത്വം ലംഘിച്ച സര്‍ക്കാര്‍, നിയമത്തിന്റെ കാവല്‍ക്കാരനാകേണ്ടിടത്ത് നിയമലംഘനത്തിന്റെ പ്രതീകമായി മാറുകയാണെന്നും വേണുഗോപാല്‍ ആരോപിച്ചു.