ന്യൂഡല്‍ഹി; ഡല്‍ഹിയില്‍ വീണ്ടും തെരഞ്ഞെടുപ്പ് നടത്താന്‍ വെല്ലുവിളിച്ച് ഡല്‍ഹി മുന്‍ മുഖ്യമന്ത്രി അരവിന്ദ് കെജ്‌രിവാള്‍. ബിജെപിക്ക് പത്ത് സീറ്റില്‍ അധികം ലഭിച്ചാല്‍ താന്‍ രാഷ്ട്രീയം നിര്‍ത്തുമെന്നും കെജ്‌രിവാള്‍ വ്യക്തമാക്കി. നരേന്ദ്രമോദി, അമിത് ഷാ എന്നിവരുടെ ഗൂഢാലോചനയാണ് മദ്യനയ അഴിമതിക്കേസ് പിന്നിലെന്നും അരവിന്ദ് കെജ്‌രിവാള്‍ പറഞ്ഞു. പിന്നാലെ അവര്‍ മാപ്പ് പറയണമെന്ന് അദ്ദേഹം ആവശ്യപ്പെട്ടു.

'പ്രധാനമന്ത്രി നരേന്ദ്ര മോദിയുടെയും അമിത് ഷായുടെയും അധികാര ദാഹത്തിന്റെ ഫലമാണ്. അധികാരത്തിനായുള്ള ആ മോഹത്തില്‍ നിന്നാണ് ഈ ഗൂഢാലോചന ഉടലെടുത്തത്. എന്റെ ഭാര്യ പലപ്പോഴും സുഖമില്ലാതെ ആശുപത്രിയില്‍ പ്രവേശിപ്പിക്കപ്പെട്ടു. എന്റെ അമ്മ ഒരുപാട് കരഞ്ഞു. മോദിയും അമിത് ഷായും ചേര്‍ന്ന് നടത്തിയ ഈ ഗൂഢാലോചനയുടെ യഥാര്‍ത്ഥ വില ഡല്‍ഹിയാണ് വഹിക്കുന്നത്. ഡല്‍ഹിയിലെ മൂന്ന് കോടി ജനങ്ങള്‍ ഇതിന്റെ പേരില്‍ കഷ്ടപ്പെടുന്നു. ആരാണ് അതിന്റെ ഉത്തരവാദിത്തം ഏറ്റെടുക്കുക?' അരവിന്ദ് കെജ്‌രിവാള്‍ പറഞ്ഞു.

അതേസമയം ഡല്‍ഹിയിലെ ജനങ്ങള്‍ ഞങ്ങളുടെ പ്രവര്‍ത്തനങ്ങളില്‍ സന്തുഷ്ടരായിരുന്നു. ഞാന്‍ സത്യസന്ധനാണെന്ന് പൊതുജനങ്ങള്‍ക്ക് അറിയാം, അതിനാല്‍ അവര്‍ എന്റെ സത്യസന്ധതയെ ആക്രമിച്ചു. ആം ആദ്മി പാര്‍ട്ടി സത്യസന്ധമാണെന്ന് പൊതുജനങ്ങള്‍ക്ക് അറിയാം. അതിനാല്‍ അവര്‍ പാര്‍ട്ടിയുടെ സമഗ്രതയെ ലക്ഷ്യം വച്ചു. 'കെജ്‌രിവാള്‍ സത്യസന്ധനല്ല' എന്ന് ആവര്‍ത്തിച്ച് പറഞ്ഞുകൊണ്ട് അവര്‍ ആം ആദ്മി പാര്‍ട്ടിയെ ഇല്ലാതാക്കാന്‍ ഗൂഢാലോചന നടത്തിയെന്നും കെജ്‌രിവാള്‍ പറഞ്ഞു. 

ഡല്‍ഹി മദ്യനയക്കേസില്‍ അരവിന്ദ് കെജ്‌രിവാളും മനീഷ് സിസോദിയയും ഇന്നാണ് കുറ്റവിമുക്തരായത്. ഇരുവരേയും പ്രതിപ്പട്ടികയില്‍ നിന്ന് ഒഴിവാക്കി. കേസില്‍ അന്വേഷണം നടത്തിയ സി.ബി.ഐയ്‌ക്കെതിരെ കോടതി രൂക്ഷവിമര്‍ശനമാണ് നടത്തിയത്. തെളിവില്ലാതെ കേസില്‍ ഉള്‍പ്പെടുത്തിയതെന്തിനെന്ന് കോടതി സി.ബി.ഐയോട് ചോദിച്ചു.

ALSO READ: ഡല്‍ഹി മദ്യനയക്കേസ്: കെജ്‌രിവാളും സിസോദിയയും കുറ്റവിമുക്തര്‍; സി.ബി.ഐയ്ക്ക് കോടതിയുടെ രൂക്ഷവിമര്‍ശനം

തെലങ്കാന മുന്‍ മുഖ്യമന്ത്രി കെ ചന്ദ്രശേഖര്‍ റാവുവിന്റെ മകള്‍ കെ. കവിത അടക്കമുള്ള കേസിലെ മുഴുവന്‍ പ്രതികളെയും കോടതി വിട്ടയച്ചു. വിധി വന്നതിന് പിന്നാലെ മാധ്യമങ്ങളെ കണ്ട കെജ്‌രിവാള്‍ പൊട്ടിക്കരഞ്ഞു. പ്രധാനമന്ത്രി നരേന്ദ്രമോദിയും ആഭ്യന്തര മന്ത്രി അമിത് ഷായും ചേര്‍ന്ന കെട്ടിച്ചമച്ച കേസ് ആണിതെന്നും കെജ്രിവാള്‍ പറഞ്ഞു. ആയിരത്തിലേറെ പേജുകളുള്ള കുറ്റപത്രത്തില്‍ നിരവധി പോരായ്മകള്‍ ഉണ്ടെന്നും സാക്ഷിമൊഴികളോ തെളിവുകളോ ഇതിനെ പിന്തുണയ്ക്കുന്നില്ലെന്നും കോടതി നിരീക്ഷിച്ചു.

2024 മാര്‍ച്ച് 21 നാണ് കെജ് രിവാള്‍ മദ്യനയക്കേസില്‍ അറസ്റ്റിലാവുന്നത്. എ.എ.പി 100 കോടി രൂപ മദ്യലോബിയില്‍ നിന്ന് അനധികൃതമായി കൈപ്പറ്റിയെന്നാണ് പറയുന്നത്. കേസില്‍ കുറ്റാരോപിതനായ വിജയ് നായര്‍ കെജ്രിവാളിനെ ഇടയ്ക്കിടെ ഓഫിസിലെത്തി കണ്ടതായി ഇ.ഡി റിമാന്‍ഡ് നോട്ടിലും കുറ്റപത്രത്തിലും പറയുന്നു.

ഭാരത് രാഷ്ട്ര സമിതി (ബി.ആര്‍.എസ്) നേതാവ് കെ. കവിതയെ കെജ്രിവാളുമായി ഗൂഢാലോചന നടത്തിയെന്നാരോപിച്ച് അറസ്റ്റ് ചെയ്തിരുന്നു. എ.എ.പി നേതാക്കളായ മനീഷ് സിസോദിയ, സഞ്ജയ് സിങ് എന്നിവരെയും മദ്യനയ കേസില്‍ അറസ്റ്റ് ചെയ്തിരുന്നു.