ദുബൈ: നഗരത്തിലെ ഏറ്റവും തിരക്കേറിയ ഇടനാഴികളിലൊന്നായ വേൾഡ് ട്രേഡ് സെന്റർ റൗണ്ട്എബൗട്ടിലെ ഗതാഗതക്കുരുക്കിന് പരിഹാരവുമായി റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). ശൈഖ് സായിദ് റോഡിനെ ശൈഖ് ഖലീഫ ബിൻ സായിദ് സ്ട്രീറ്റുമായി ബന്ധിപ്പിക്കുന്ന പുതിയ പാലം ഔദ്യോഗികമായി ഗതാഗതത്തിനായി തുറന്നുകൊടുത്തു. ഇതോടെ മുൻപ് ആറ് മിനിറ്റോളം എടുത്തിരുന്ന യാത്രാസമയം വെറും ഒരു മിനിറ്റായി കുറയും.

ആർടിഎയുടെ പുതിയ വികസന പദ്ധതിയുടെ ഭാഗമായി തുറന്ന ഈ പാലത്തിന് 1,000 മീറ്റർ നീളമാണുള്ളത്. മണിക്കൂറിൽ 3,000 വാഹനങ്ങളെ വരെ ഉൾക്കൊള്ളാൻ ശേഷിയുള്ള രണ്ട് പാതകളാണ് പാലത്തിൽ സജ്ജമാക്കിയിരിക്കുന്നത്. ശൈഖ് സായിദ് റോഡിൽ നിന്ന് അൽ കരാമ, ദേര തുടങ്ങിയ ജനസാന്ദ്രതയേറിയ പ്രധാന ഇടങ്ങളിലേക്കുള്ള ഗതാഗതം സുഗമമാക്കുന്നതിലൂടെ യാത്രാക്ലേശത്തിന് വലിയൊരു പരിഹാരമാകുമെന്നാണ് കരുതുന്നത്.

ALSO READ: യുഎഇയിൽ മരുന്ന് വില 20% കുറഞ്ഞേക്കും; കുത്തക തകർക്കാൻ 'മൾട്ടിപ്പിൾ ഏജന്റ്' സംവിധാനം, കൃത്രിമത്വം തടയാൻ കർശന നടപടി

വേൾഡ് ട്രേഡ് സെന്റർ റൗണ്ട്എബൗട്ട് വികസന പദ്ധതിയുടെ ഭാഗമായി തുറക്കുന്ന മൂന്നാമത്തെ പാലമാണിത്. ഇക്കഴിഞ്ഞ ഫെബ്രുവരിയിൽ പദ്ധതിയുടെ ആദ്യ രണ്ട് പാലങ്ങൾ ഗതാഗതത്തിനായി തുറന്നിരുന്നു.

നിലവിൽ പദ്ധതിയുടെ 60 ശതമാനത്തിലധികം ജോലികൾ പൂർത്തിയായിക്കഴിഞ്ഞു. ആകെ അഞ്ച് പാലങ്ങളാണ് ഈ പദ്ധതിയുടെ ഭാഗമായുള്ളത്. ബാക്കിയുള്ള രണ്ട് പാലങ്ങൾ കൂടി 2026 ഒക്ടോബറോടെ പൂർത്തിയാകുമെന്ന് ആർ‌ടി‌എ ഡയറക്ടർ ജനറൽ മതാർ അൽ തായർ അറിയിച്ചു.

മുഴുവൻ പദ്ധതിയും യാഥാർത്ഥ്യമാകുന്നതോടെ റൗണ്ട്എബൗട്ടിലെ ശരാശരി കാത്തിരിപ്പ് സമയം 12 മിനിറ്റിൽ നിന്ന് 90 സെക്കൻഡായി കുറയും. അതായത് ഏകദേശം 92% സമയലാഭം യാത്രക്കാർക്ക് ലഭിക്കും. കൂടാതെ, നിലവിലുള്ള റൗണ്ട്എബൗട്ട് മാറ്റി സിഗ്നലുകളോട് കൂടിയ ഇന്റർസെക്ഷനായി ഇത് പരിഷ്കരിക്കുകയും ചെയ്യും.

a new bridge has opened at the dubai world trade centre roundabout, significantly easing traffic congestion. authorities said the project will reduce travel time from six minutes to just one minute, improving connectivity and traffic flow in the busy business district.