ലക്‌നൗ: യുപിയില്‍ എക്‌സ്പ്രസ് ഹൈവേയുടെ ചുമരുകളില്‍ മുസ്‌ലിങ്ങള്‍ക്ക് പ്രവേശനമില്ലെന്ന് എഴുതിയ ഹിന്ദു രക്ഷാദള്‍ പ്രവര്‍ത്തകര്‍ക്കെതിരെ കേസ്. ഡല്‍ഹി-ഡെറാഡൂണ്‍ പാതയില്‍ സഹാറാന്‍പൂര്‍ എക്‌സ്പ്രസ് വേ പാതയില്‍ ഇന്നലെ രാത്രി 11 മണിക്കാണ് ചുവരെഴുത്ത് പ്രത്യക്ഷപ്പെട്ടത്. ദേശീയപാത അതോറിറ്റി ജീവനക്കാരന്റെ പരാതിയിലാണ് ബിഹാറിഗര്‍ പൊലിസ് കേസ് രജിസ്റ്റര്‍ ചെയ്തത്. 

വെള്ളിയാഴ്ച്ച രാവിലെ അതുവഴി കടന്നുപോയ യാത്രക്കാരാണ് ചുമരെഴുത്ത് കണ്ടത്. ഉടന്‍ തന്നെ പൊലിസില്‍ വിവരമറിയിക്കുകയും ചെയ്തു. സംഭവത്തില്‍ ദേശീയപാത അതോറിറ്റി ജീവനക്കാരന്‍ സുനില്‍കുമാറാണ് പൊലിസില്‍ പരാതി നല്‍കിയത്. പിന്നാലെ ഉത്തരവാദിത്വം ഏറ്റെടുത്ത് ഹിന്ദു രക്ഷാദള്‍ രംഗത്തെത്തി. സംസ്ഥാന അധ്യക്ഷന്‍ ലളിത് ശര്‍മ സംഭവത്തിന്റെ പൂര്‍ണ ഉത്തരവാദിത്വം താന്‍ ഏറ്റെടുക്കുമെന്ന് പരസ്യമായി വെല്ലുവിളിച്ചിരുന്നു. സഹാറാന്‍പൂരിലെ മറ്റൊരിടത്ത് നടന്ന സംഭവത്തില്‍ പ്രതിഷേധിച്ചാണ് ചുവരെഴുത്തെന്ന് ലളിത് പ്രതികരിച്ചു.  

ALSO READ: നിയമസഭ തെരഞ്ഞെടുപ്പില്‍ യുഡിഎഫ് കുതിപ്പ്; എല്‍ഡിഎഫ് കിതയ്ക്കും; തുടര്‍ഭരണ മോഹത്തിന് തിരിച്ചടിയെന്ന് പ്രീ പോള്‍ സര്‍വേ റിപ്പോര്‍ട്ട്

അതേസമയം ഹിന്ദുരക്ഷാ പ്രവര്‍ത്തകര്‍ കറുത്ത പെയിന്റുമായി ചുവരെഴുതുന്നതിന്റെ ദൃശ്യങ്ങല്‍ സമൂഹമാധ്യമങ്ങളില്‍ വ്യാപകമായി പ്രചരിച്ചതിന് പിന്നാലെയാണ് പൊലിസ് കേസെടുക്കാന്‍ തയ്യാറായത്. കുറ്റക്കാരെ കണ്ടെത്തുന്നതിനായി അന്വേഷണം ആരംഭിച്ചിട്ടുണ്ടെന്നും ഉടന്‍ പിടികൂടുമെന്നും പൊലിസ് ഉദ്യോഗസ്ഥര്‍ അറിയിച്ചു.

case has been registered against hindu raksha dal activists for writing ‘no entry for muslims’ on the walls of an express highway in up.