വയനാട്: വയനാട് മുണ്ടക്കൈ ദുരന്തബാധിതർക്ക് വേണ്ടി മുസ്ലീം ലീഗ് നിർമ്മിച്ചു നൽകുന്ന വീടുകളുടെ ആദ്യഘട്ട താക്കോൽദാനം ഇന്ന് നടക്കും. വൈകുന്നേരം നാലുമണിക്ക് മുസ്ലിം ലീഗ് സംസ്ഥാന അധ്യക്ഷൻ പാണക്കാട് സയ്യിദ് സാദിഖ് അലി ശിഹാബ് തങ്ങൾ പരിപാടി ഉദ്ഘാടനം ചെയ്യും. പ്രിയങ്ക ഗാന്ധി എംപി അടക്കമുള്ളവർ പരിപാടിയിൽ സാന്നിദ്ധ്യം അറിയിക്കും.

51 വീടുകളുടെ നിർമ്മാണമാണ് മുണ്ടക്കൈയിൽ പൂർത്തീകരിച്ചിട്ടുള്ളത്.  വയനാട് ദുരന്തബാധിതർക്ക് വേണ്ടി മുസ്ലിം ലീഗ് നൂറ് വീടുകളായിരുന്നു പ്രഖ്യാപിച്ചിരുന്നത്. ഭൂമി ഏറ്റെടുക്കുന്നതിൽ അടക്കം നിരവധി വിവാദങ്ങൾ ഉണ്ടായിരുന്നെങ്കിലും തറക്കല്ലിടലിന് ശേഷം വീട് നിർമ്മാണം വേഗത്തിൽ പൂർത്തിയാവുകയായിരുന്നു.

മേപ്പാടി പഞ്ചായത്തിലെ തൃക്കൈപ്പറ്റ വെള്ളിത്തോട് പ്രദേശത്ത് 11.5 ഏക്കർ സ്ഥലത്താണ്  വീടുകൾ നിർമ്മാണം പൂർത്തീകരിച്ചിരിക്കുന്നത്. ബാക്കിയുള്ള വീടുകളുടെ നിർമ്മാണം ഉടൻ പൂർത്തിയാക്കി മെയ് 31നുള്ളിൽ ഗുണഭോക്താക്കൾക്ക് കൈമാറാൻ സാധിക്കുമെന്നാണ് പ്രതീക്ഷിക്കുന്നത്.