കൊച്ചി: ആലപ്പുഴ- എറണാകുളം ദേശീയപാതയില്‍ എരമല്ലൂരിന് സമീപം കെഎസ്ആര്‍ടിസി ബസ് ലോറിക്ക് പിന്നിലിടിച്ചുണ്ടായ വന്‍ അപകടത്തില്‍ 40 ഓളം പേര്‍ക്ക് പരിക്ക്. ഇന്ന് രാവിലെ 11 മണിയോടെ എരമല്ലൂരിനും ചന്ദിരൂരിനും ഇടയിലായിരുന്നു അപകടം. പരിക്കേറ്റവരില്‍ പലരുടെയും നില സാരമുള്ളതാണെന്നാണ് പ്രാഥമിക വിവരം.

മുന്നില്‍ പോവുകയായിരുന്ന ടോറസ് ലോറിക്ക് പിന്നിലേക്ക് കെഎസ്ആര്‍ടിസി ബസ് നിയന്ത്രണം വിട്ട് ഇടിച്ചു കയറുകയായിരുന്നു. ഇടിയുടെ ആഘാതത്തില്‍ ബസ്സിന്റെ മുന്‍ഭാഗം പൂര്‍ണമായും തകര്‍ന്നു. പരിക്കേറ്റവരെല്ലാം ബസ്സിനുള്ളിലുണ്ടായിരുന്ന യാത്രക്കാരാണ്.

അപകടം നടന്നയുടനെ പ്രദേശവാസികളാണ് ഓടിക്കൂടി ആദ്യഘട്ട രക്ഷാപ്രവര്‍ത്തനം നടത്തിയത്. ബസ്സിനുള്ളില്‍ കുടുങ്ങിക്കിടന്ന യാത്രക്കാരെ നാട്ടുകാര്‍ പുറത്തെടുത്ത് ഉടന്‍ തന്നെ വിവിധ വാഹനങ്ങളില്‍ ആശുപത്രികളിലേക്ക് മാറ്റി. തുടര്‍ന്ന് പൊലീസും ഫയര്‍ഫോഴ്‌സും സ്ഥലത്തെത്തി ആംബുലന്‍സുകള്‍ വഴി കൂടുതല്‍ പേരെ ആശുപത്രികളിലെത്തിച്ചു.

 ALSO READ: ആര്‍സിസിയില്‍ ലാബ് ടെക്‌നീഷ്യന്‍; 22,000 തുടക്ക ശമ്പളം; കത്തയച്ച് ജോലി നേടാം 

പരിക്കേറ്റ 40 പേരെ വിവിധ ആശുപത്രികളിലായി പ്രവേശിപ്പിച്ചിരിക്കുകയാണ്. ഇതില്‍ 23 പേരെ കൊച്ചി ലേക്‌ഷോര്‍ ആശുപത്രിയിലാണ് പ്രവേശിപ്പിച്ചിരിക്കുന്നത്. ലേക്‌ഷോറില്‍ ചികിത്സയിലുള്ള പലരുടെയും പരിക്ക് സാരമുള്ളതാണെന്ന് ആശുപത്രി അധികൃതര്‍ അറിയിച്ചു. മറ്റുള്ളവരെ ചന്ദിരൂരിലെയും എറണാകുളത്തെയും വിവിധ സ്വകാര്യ ആശുപത്രികളിലും പ്രവേശിപ്പിച്ചു.

അപകടത്തെത്തുടര്‍ന്ന് ദേശീയപാതയില്‍ ദീര്‍ഘനേരം ഗതാഗത തടസ്സമുണ്ടായി. പൊലിസ് സ്ഥലത്തെത്തി തകര്‍ന്ന വാഹനങ്ങള്‍ നീക്കം ചെയ്ത് ഗതാഗതം പുനഃസ്ഥാപിച്ചു. അപകടത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. അമിത വേഗതയാണോ അതോ ഡ്രൈവര്‍ ഉറങ്ങിപ്പോയതാണോ എന്ന് പൊലിസ് അന്വേഷിച്ചുവരികയാണ്.

A major road accident occurred between Eramalloor and Chandiroor as a KSRTC bus rammed into a truck, leaving 40 passengers injured with several in critical condition.