ദുബൈ: പശ്ചിമേഷ്യയിൽ യുദ്ധം ഒൻപതാം ദിവസത്തിലേക്ക് കടന്നതോടെ യുഎഇ ഉൾപ്പെടെയുള്ള ഗൾഫ് രാജ്യങ്ങളിലെ ഇന്ത്യൻ പ്രവാസികൾക്കും സന്ദർശകർക്കും കർശന ജാഗ്രതാ നിർദ്ദേശങ്ങൾ നൽകി കേന്ദ്ര സർക്കാർ. മാർച്ച് ഒന്നു മുതൽ ഏഴു വരെയുള്ള കാലയളവിൽ 52,000-ത്തിലധികം ഇന്ത്യക്കാർ സുരക്ഷിതമായി നാട്ടിലെത്തിയതായി വിദേശകാര്യ മന്ത്രാലയം അറിയിച്ചു. ഇതിൽ 32,107 പേർ ഇന്ത്യൻ വിമാനക്കമ്പനികളിലാണ് മടങ്ങിയത്.

എംബസിയുടെ കർശന നിർദ്ദേശങ്ങൾ

അബുദബിയിലെ ഇന്ത്യൻ എംബസി പുറപ്പെടുവിച്ച പുതിയ ഉപദേശ പ്രകാരം, യുഎഇയിലെ ഇന്ത്യൻ പൗരന്മാർ താഴെ പറയുന്ന കാര്യങ്ങൾ പ്രത്യേകം ശ്രദ്ധിക്കണം.

ചിത്രീകരണം നിരോധിച്ചു: വിമാനത്താവളങ്ങൾ, സംഭവസ്ഥലങ്ങൾ, നിരോധിത മേഖലകൾ എന്നിവിടങ്ങളിൽ അനുമതിയില്ലാതെ ഫോട്ടോയോ വീഡിയോയോ എടുക്കരുത്. ഇത് യുഎഇ നിയമപ്രകാരം കടുത്ത ശിക്ഷാർഹമായ കുറ്റമാണ്.

സോഷ്യൽ മീഡിയ ജാഗ്രത: മിസൈൽ അവശിഷ്ടങ്ങൾ വീണ സ്ഥലങ്ങളുടെയോ നാശനഷ്ടങ്ങളുടെയോ ചിത്രങ്ങൾ സോഷ്യൽ മീഡിയയിൽ പങ്കുവെക്കരുത്.

സുരക്ഷാ മുൻകരുതൽ: സൈറൺ മുഴങ്ങുമ്പോൾ ഉടൻ സുരക്ഷിത കേന്ദ്രങ്ങളിലേക്ക് മാറണം. സംശയാസ്പദമായ വസ്തുക്കൾ കണ്ടാൽ അധികൃതരെ അറിയിക്കണം; അവയിൽ സ്പർശിക്കരുത്.

ALSO READ: യുഎഇയിൽ കുടുങ്ങിയവർക്ക് ആശ്വാസവുമായി എയർ ഇന്ത്യ; യുഎഇയിലെ ഏത് വിമാനത്താവളത്തിൽ നിന്നും സൗജന്യമായി റീബുക്ക് ചെയ്യാം

വിമാന സർവീസുകളും റീബുക്കിംഗും

വ്യോമാതിർത്തി ഭാഗികമായി തുറന്നതോടെ കുടുങ്ങിക്കിടക്കുന്നവരെ നാട്ടിലെത്തിക്കാൻ എയർ ഇന്ത്യയും എയർ ഇന്ത്യ എക്സ്പ്രസും പ്രത്യേക സർവീസുകൾ നടത്തുന്നുണ്ട്.

അധിക സർവീസുകൾ: മാർച്ച് 8-ന് അബുദബി, ദുബൈ, മസ്കത്ത്, റാസൽഖൈമ, ഷാർജ എന്നിവിടങ്ങളിൽ നിന്ന് ഇന്ത്യയിലേക്ക് കൂടുതൽ വിമാനങ്ങൾ ഷെഡ്യൂൾ ചെയ്തിട്ടുണ്ട്.

റദ്ദാക്കിയവ: ബഹ്‌റൈൻ, കുവൈത്ത്, ദോഹ, ദമ്മാം, റിയാദ് എന്നിവിടങ്ങളിലേക്കുള്ള എയർ ഇന്ത്യ എക്സ്പ്രസ് സർവീസുകൾ മാർച്ച് 13 വരെ റദ്ദാക്കി. എയർ ഇന്ത്യയുടെ വിമാനങ്ങൾ മാർച്ച് 10 വരെയും ഉണ്ടാവില്ല.

ഇളവുകൾ: വിമാനങ്ങൾ റദ്ദാക്കപ്പെട്ട യാത്രക്കാർക്ക് അധിക തുക നൽകാതെ റീബുക്ക് ചെയ്യാനോ അല്ലെങ്കിൽ മുഴുവൻ തുകയും റീഫണ്ട് വാങ്ങാനോ സാധിക്കും.

ഹെൽപ്പ് ലൈൻ വിവരങ്ങൾ

വിദേശകാര്യ മന്ത്രാലയം പ്രത്യേക കൺട്രോൾ റൂം സജ്ജമാക്കിയിട്ടുണ്ട്. സഹായം ആവശ്യമുള്ളവർക്ക് താഴെ പറയുന്ന മാർഗങ്ങളിലൂടെ ബന്ധപ്പെടാം:

എയർ ഇന്ത്യ: +91 11 6932 9333 / +91 11 6932 9999

എയർ ഇന്ത്യ എക്സ്പ്രസ് (WhatsApp): +91 63600 12345 (ടിയ - ഡിജിറ്റൽ അസിസ്റ്റന്റ്)

വിദേശകാര്യ മന്ത്രാലയം: mea.gov.in

യാത്രയ്ക്ക് പുറപ്പെടുന്നതിന് മുൻപായി വിമാനങ്ങളുടെ സ്റ്റാറ്റസ് ഓൺലൈനായി പരിശോധിച്ച് ഉറപ്പുവരുത്തണമെന്ന് വിദേശകാര്യ മന്ത്രാലയം നിർദ്ദേശിച്ചു.

more than 52,000 indian nationals have returned from gulf countries since the conflict began. the indian embassy in abu dhabi has issued strict advisories for expatriates, urging them to follow safety guidelines and stay updated with official announcements.