ഇസ്ലാമാബാദ്: ബലൂചിസ്ഥാനില്‍ 1,200 പേരുടെ മൃതദേഹങ്ങള്‍ കണ്ടെത്തിയതില്‍ പാക് സെനറ്റിലെ മനുഷ്യാവകാശ കമ്മിറ്റി ആശങ്ക രേഖപ്പെടുത്തി.
മുത്തഹിദാ ഖ്വാമി മൂവ്്‌മെന്റ് നേതാവ് നസ്്‌രീം ജലീലിന്റെ അധ്യക്ഷതയിലാണ് സെനറ്റ് ഉപസമിതി യോഗം ചേര്‍ന്നത്. ബലൂചിസ്ഥാനിലെ ജനങ്ങള്‍ സര്‍ക്കാരിലും ഭരണഘടനാ സ്ഥാപനങ്ങളിലും വിശ്വസിക്കുന്നില്ലെന്ന് സമിതി വിലയിരുത്തി.
ബലൂചിസ്ഥാനില്‍ കണ്ടെത്തിയ 1200 പേരുടെ മൃതദേഹങ്ങളെ കുറിച്ച് പാകിസ്താന്‍ റേഞ്ചേഴ്‌സ് ഡയറക്ടര്‍ ജനറല്‍ സമിതിയുടെ അടുത്തയോഗത്തിനു മുമ്പ് വിശദീകരണം നല്‍കണമെന്നും സമിതിയുടെ പ്രസ്താവനയില്‍ പറഞ്ഞു. 2014 മുതല്‍ 2016 വരെ 545 പേര്‍ കൊല്ലപ്പെട്ടുവെന്നാണ് പൊലിസ് ഉദ്യോഗസ്ഥര്‍ മൊഴി നല്‍കി. ഓരോ വര്‍ഷവും നടന്ന മരണങ്ങളെ കുറിച്ച് പൊലിസില്‍ നിന്ന് വിശദമായ റിപ്പോര്‍ട്ട് സമിതി ആവശ്യപ്പെട്ടു.
തിരിച്ചറിയപ്പെടാത്ത 1200 മൃതദേഹങ്ങളെ കുറിച്ച് ഡി.എന്‍.എ പരിശോധന നല്‍കാന്‍ സുപ്രിംകോടതി പൊലിസിനു നിര്‍ദേശം നല്‍കിയിട്ടുണ്ട്. മൃതദേഹങ്ങളുടെ അവകാശികളെത്താത്തതിനാല്‍ ഡി.എന്‍.എ പരിശോധന നടത്തിയിട്ടില്ലെന്നാണ് പൊലിസ് പറയുന്നത്. ബലൂചില്‍ സൈന്യം സ്വാതന്ത്ര്യവാദികളെ കൊന്നൊടുക്കുന്നുവെന്ന ആരോപണത്തിന് ശക്തിപകരുന്നതാണ് ഈ സംഭവമെന്നാണ് ബലൂച് വാദികള്‍ പറയുന്നത്.