തൊടുപുഴ: കനത്ത ചൂടിൽ മൂന്നാറിൽ അൾട്രാവയലറ്റ് (യു.വി) വികിരണ സൂചിക എട്ടിൽ എത്തിയതോടെ അതീവ ജാഗ്രത പാലിക്കണമെന്ന് ജില്ലാ കലക്ടർ നിർദേശം നൽകി. കനത്ത ചൂടിൽ ആശ്വാസം തേടി മൂന്നാറിലെത്തുന്നവർ ഇത്തവണ കൂടുതൽ ശ്രദ്ധിക്കണമെന്നാണ് മുന്നറിയിപ്പ്. 
പുറത്തിറങ്ങുമ്പോൾ തലയും ശരീരവും മറയ്ക്കണം. നേരിട്ട് വെയിൽ കൊള്ളരുത്. വിനോദസഞ്ചാരികൾക്ക് ആവശ്യമായ മുന്നറിയിപ്പുകൾ നൽകാൻ ടൂറിസം വകുപ്പിനും ഡി.ടി.പി.സിക്കും കലക്ടർ നിർദേശം നൽകി. മൂന്നാറിലെ തോട്ടം തൊഴിലാളികൾ രാവിലെ 10 മുതൽ വൈകിട്ട് മൂന്ന് വരെ ജോലിക്കിറങ്ങരുത്. നിർദേശം ലംഘിക്കുന്ന തോട്ടം മാനേജ്‌മെന്റുകൾക്കെതിരേ നടപടിയെടുക്കുമെന്നും കലക്ടർ പറഞ്ഞു. സൂചിക 11 ലെത്തിയാൽ റെഡ് അലർട്ട് പ്രഖ്യാപിക്കും.
ഇടുക്കി ജില്ലയിലെ തന്നെ കട്ടപ്പനയിലും ഹൈറേഞ്ചിലെ വിവിധ ഭാഗങ്ങളിലും കഴിഞ്ഞ ഏതാനും ദിവസങ്ങളായി കനത്ത ചൂടാണ് അനുഭവപ്പെടുന്നത്. കട്ടപ്പനയിൽ ഇന്നലെ യുവാവിന് സൂര്യാതപത്തെ തുടർന്ന് പൊള്ളലേറ്റിരുന്നു. കുന്തളംപാറ ഭാഗത്ത് ഫർണിച്ചർ നിർമാണ വർക് ഷോപ്പ് നടത്തുന്ന താഴത്തുവീട്ടിൽ അജീഷ് (45)നാണ് കൈയിൽ പൊള്ളലേറ്റത്. വാച്ച് കെട്ടിയ ഭാഗത്ത് വാച്ചിന്റെ സ്ട്രാപ്പ് ഉൾപ്പെടെ ചൂടായി പൊള്ളലേൽക്കുകയായിരുന്നു. തുടർന്ന് കട്ടപ്പന താലൂക്ക് ആശുപത്രിയിൽ ചികിത്സ തേടി.