ന്യൂഡല്‍ഹി: ഇന്ത്യയില്‍ മാധ്യമ സ്വാതന്ത്ര്യം തടസ്സപ്പെടുന്നുവെന്ന പ്രചാരണം വെറും കള്ളക്കഥയാണെന്ന് വിദേശകാര്യ മന്ത്രാലയം വ്യക്തമാക്കി. കൃത്യമായ വിവരങ്ങളില്ലാതെ ചില സന്നദ്ധ സംഘടനകള്‍ തയ്യാറാക്കുന്ന റിപോര്‍ട്ടുകളെയാണ് ചിലര്‍ ആശ്രയിക്കുന്നതെന്നും മന്ത്രാലയത്തിലെ സെക്രട്ടറി (വെസ്റ്റ്) സിബി ജോര്‍ജ് പറഞ്ഞു.

നോര്‍വേയില്‍ നടന്ന വാര്‍ത്താസമ്മേളനത്തില്‍ മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി നല്‍കുകയായിരുന്നു അദ്ദേഹം. നൂറുകണക്കിന് മാധ്യമങ്ങള്‍ ഇന്ത്യയില്‍ പൂര്‍ണ്ണ സ്വാതന്ത്ര്യത്തോടെയാണ് പ്രവര്‍ത്തിക്കുന്നതെന്നും വോട്ടവകാശത്തിലൂടെ സര്‍ക്കാരിനെ മാറ്റാനുള്ള ജനങ്ങളുടെ അധികാരമാണ് ഏറ്റവും വലിയ മനുഷ്യാവകാശമെന്നും അദ്ദേഹം കൂട്ടിച്ചേര്‍ത്തു.

അതേസമയം, നോര്‍വെ സന്ദര്‍ശനത്തിനിടെ പ്രധാനമന്ത്രി നരേന്ദ്ര മോദി മാധ്യമങ്ങളുടെ ചോദ്യങ്ങളോട് പ്രതികരിക്കാതിരുന്നതിനെ രൂക്ഷമായി വിമര്‍ശിച്ച് കോണ്‍ഗ്രസ് നേതാവ് രാഹുല്‍ ഗാന്ധി രംഗത്തെത്തി. ഒളിച്ചുവയ്ക്കാന്‍ ഒന്നുമില്ലെങ്കില്‍ ചോദ്യങ്ങളെ എന്തിന് ഭയക്കണമെന്ന് രാഹുല്‍ ചോദിച്ചു. വിദേശമണ്ണില്‍ മാധ്യമങ്ങളില്‍ നിന്ന് ഒളിച്ചോടുന്നത് രാജ്യത്തെക്കുറിച്ച് തെറ്റായ സന്ദേശമാണ് നല്‍കുകയെന്നും അദ്ദേഹം ചൂണ്ടിക്കാട്ടി.

 പ്രധാനമന്ത്രിയോട് ചോദ്യങ്ങള്‍ നേരിടാന്‍ മടിക്കുന്നത് എന്തുകൊണ്ടാണെന്ന് ഒരു വിദേശ മാധ്യമപ്രവര്‍ത്തക വിളിച്ചു ചോദിച്ചതും ഇന്ത്യയിലെ മാധ്യമ സ്വാതന്ത്ര്യത്തിലും ന്യൂനപക്ഷ അവകാശങ്ങളിലും ഡച്ച് പ്രധാനമന്ത്രി ആശങ്ക പ്രകടിപ്പിച്ചതും ഇതിനോടകം വലിയ രാഷ്ട്രീയ വിവാദമായി മാറിയിട്ടുണ്ട്.

While the Ministry of External Affairs dismissed allegations of restricted press freedom in India as a false narrative, Congress leader Rahul Gandhi criticized Prime Minister Narendra Modi for avoiding questions from the media during his foreign visit.