കല്‍പ്പറ്റ: സംസ്ഥാന വിനോദസഞ്ചാര വകുപ്പിന്റെ സാമ്പത്തിക സഹായത്തോടെ വയനാട് ജില്ലാ ടൂറിസം പ്രമോഷന്‍ കൗണ്‍സിലിന്റെ നേതൃത്വത്തില്‍ ജില്ലാ ഭരണകൂടം, ത്രിതലപഞ്ചായത്തുകള്‍, ഡസ്റ്റിനേഷന്‍ മാനേജ്‌മെന്റ് കൗണ്‍സിലുകള്‍, ടൂറിസം ക്ലബുകള്‍, ടൂറിസം ഓര്‍ഗനൈസേഷനുകള്‍, കുടുംബശ്രീ, ഐ.റ്റി.ഡി.പി, താലൂക്കൂകള്‍, മറ്റു സന്നദ്ധ സംഘടനകള്‍ എന്നിവയുടെ സഹകരണത്തോടെ ഈമാസം 12 മുതല്‍ 18 വരെ ജില്ലയിലെ വിവിധ കേന്ദ്രങ്ങളില്‍ നടത്തിയ ഓണം മെഗാ ഫെസ്റ്റിവല്‍- 2016 സമാപിച്ചു.
വൈകിട്ട് നാലിന് നെന്മേനി പഞ്ചായത്തിലെ കുപ്പക്കൊല്ലിയില്‍ നിന്ന് ആരംഭിച്ച സമാപനഘോഷയാത്രയില്‍ നൂറ്കണക്കിന് പ്രദേശവാസികളും വിനോദസഞ്ചാരികളും പങ്കെടുത്തു. എടക്കല്‍ പാര്‍ക്കിംഗ് പരിസരത്ത് സമാപിച്ച ഘോഷയാത്രയില്‍ നിശ്ചലദൃശ്യങ്ങള്‍, കേരളകലാരൂപങ്ങള്‍, പുലിക്കളി തുടങ്ങിയവ അരങ്ങേറി. തുടര്‍ന്ന് നടന്ന സാംസ്‌കാരിക സമ്മേളനം ഐ.സി ബാലകൃഷ്ണന്‍ എം.എല്‍.എ ഉദ്ഘാടനം ചെയ്തു.
നെന്മേനി ഗ്രാമപഞ്ചായത്ത് പ്രസിഡന്റ് സി.ആര്‍ കറുപ്പന്‍ അധ്യക്ഷനായി. ബ്ലോക്ക്പഞ്ചായത്ത് മെംബര്‍ രേഖാ ദേവന്‍, ഗീതാ സത്യനാഥന്‍, എടക്കല്‍ ഗുഹാ മാനേജര്‍ ബിജു ജോസഫ് സംസാരിച്ചു.