മണ്ണാര്‍ക്കാട്: നാട്ടിലിറങ്ങിയ കാട്ടാനക്കൂട്ടം വ്യാപകമായി കൃഷി നശിപ്പിച്ചു. കഴിഞ്ഞ മൂന്നു മാസത്തോളമായി മണ്ണാര്‍ക്കാട്ടെ വിവിധ പ്രദേശങ്ങളില്‍ ജനജീവിതത്തെ ഭീതി പരത്തിയ കാട്ടാനക്കൂട്ടമാണ് ബുധനാഴ്ച രാത്രിയില്‍ കൃഷിയിടത്തിറങ്ങിയ വ്യാപകമായി കൃഷി നശിപ്പിച്ചത്. അമ്പംകുന്ന്, തോടുകാട് ഭാഗത്താണ് കഴിഞ്ഞ ദിവസം ആറംഗസംഘ കാട്ടാനക്കൂട്ടമിറങ്ങിയത്.
മുളളന്‍കര ശാരദ, വല്ലത്ത് സുകുമാരന്‍, കൊട്ടിലമ്മാര്‍ സുധാകരന്‍, കൊല്ലംപുറത്ത് ചന്ദ്രന്‍ എന്നിവരുടെ കൃഷികളിലാണ് ഏറെയും നാശം വിതച്ചിരിക്കുന്നത്. വാഴ, കവുങ്ങ്, തെങ്ങ്, നെല്ല് എന്നീകൃഷികളാണ് കാട്ടാനസംഘം ഏറെയും നശിപ്പിച്ചിരിക്കുന്നത്. അട്ടപ്പാടി, നിലമ്പൂര്‍ എന്നിവിടങ്ങളില്‍ നിന്നെത്തിയ ആര്‍.ആര്‍.ടിയും, മണ്ണാര്‍ക്കാട്ടെ വനപാലകരും, മുത്തങ്ങയില്‍ നിന്ന് പ്രത്യേകം പരിശീലനം ലഭിച്ച വരടക്കം 30 അംഗം സംഘം കഴിഞ്ഞ രണ്ട് ആഴ്ചയോളമായി കാട്ടാനകളെ തുരത്തുന്നതിന് നേതൃത്വം നല്‍കി വരുന്നുണ്ട്.