തിരുവനന്തപുരം: പാറശാല പൊലിസിന്റെ കസ്റ്റഡിയിലിരിക്കെ വിഷം ഉള്ളില്‍ ചെന്ന് മരിച്ച ശ്രീജീവിന്റെ കുടുംബത്തിന് സര്‍ക്കാര്‍ നഷ്ടപരിഹാരമായി അനുവദിച്ച പത്ത് ലക്ഷം രൂപ അടിയന്തരമായി നല്‍കണമെന്ന് സംസ്ഥാന മനുഷ്യാവകാശ കമ്മിഷന്‍.
കഴിഞ്ഞ മാസം മൂന്നിന് ഇതു സംബന്ധിച്ച് സര്‍ക്കാര്‍ ഉത്തരവ് ഇറങ്ങിയെങ്കിലും തുക നല്‍കിയില്ലെന്ന് ആരോപിച്ച്  ശ്രീജീവിന്റെ സഹോദരന്‍ എസ്.ആര്‍ ശ്രീജിത്തും അമ്മ രമണി പ്രമീളയും സമര്‍പ്പിച്ച പരാതിയിലാണ് കമ്മിഷന്‍ ആക്റ്റിങ് ചെയര്‍പേഴ്‌സണ്‍ പി. മോഹനദാസിന്റെ ഉത്തരവ്.
പൊലിസ് കംപ്ലയിന്റ്  അതോറിറ്റി അധ്യക്ഷന്‍ ജസ്റ്റിസ് കെ. നാരായണക്കുറുപ്പ് ഇറക്കിയ ഉത്തരവിന്റെ അടിസ്ഥാനത്തിലാണ് ആഭ്യന്തരവകുപ്പ് അഡീഷണല്‍ ചീഫ് സെക്രട്ടറി പത്ത് ലക്ഷം രൂപ അനുവദിച്ചത്.  
2014 മേയ് 19 നാണ് ശ്രീജീവിനെ  പാറശാല പൊലിസ് കസ്റ്റഡിയിലെടുത്തത്. ശ്രീജീവ് വിഷം കഴിച്ചെന്ന് പറഞ്ഞ് രാത്രി മെഡിക്കല്‍ കോളജില്‍ പൊലിസ് പ്രവേശിപ്പിക്കുകയായിരുന്നു.  എന്നാല്‍ ശ്രീജീവിനെ കൊലപ്പെടുത്തുക എന്ന ഉദ്ദേശത്തോടെ പൊലിസ് മര്‍ദ്ദിച്ചവശനാക്കി വിഷം കഴിപ്പിച്ചതാണെന്ന് കംപ്ലയിന്റ് അതോറിറ്റി കണ്ടെത്തിയിരുന്നു.
നഷ്ടപരിഹാരം സര്‍ക്കാര്‍ നല്‍കിയ ശേഷം കുറ്റക്കാരായ ഉദ്യോഗസ്ഥരില്‍ നിന്നും ഈടാക്കണമെന്നാണ് സര്‍ക്കാര്‍ ഉത്തരവ്. കസ്റ്റഡി മരണം അന്വേഷിക്കാന്‍ പ്രത്യേക അന്വേഷണ സംഘത്തെ നിയോഗിക്കാനും സര്‍ക്കാര്‍ ഉത്തരവിട്ടിരുന്നു.  കുറ്റക്കാരായ ഉദ്യോഗസ്ഥരെ സര്‍വിസില്‍ നിന്നും മാറ്റി നിര്‍ത്താനും ആഭ്യന്തര വകുപ്പ് അഡീഷണല്‍ ചീഫ് സെക്രട്ടറി ഡി.ജി.പിയ്ക്ക് നിര്‍ദേശം നല്‍കിയിരുന്നു.
നഷ്ടപരിഹാര തുക നല്‍കിയ ശേഷം ആഭ്യന്തര വകുപ്പ് അഡീഷണല്‍ ചീഫ് സെക്രട്ടറി മനുഷ്യാവകാശ കമ്മിഷനില്‍ മൂന്നാഴ്ചയ്ക്കകം വിശദീകരണം നല്‍കണം.  
കേസ് ഈ മാസം 26 ന് തിരുവനന്തപുരത്ത്  നടക്കുന്ന സിറ്റിങില്‍ പരിഗണിക്കും.