തിരുവനന്തപുരം: സ്വാശ്രയ മെഡിക്കല്‍ കോളജുകളിലേക്ക് സെപ്റ്റംബര്‍ 28ന് ശേഷം നടത്തിയ എല്ലാ പ്രവേശനങ്ങളും റദ്ദാക്കുമെന്ന് ജെയിംസ് കമ്മിറ്റി.
മാനേജുമെന്റ് സീറ്റുകളിലേക്ക് 28ന് ശേഷം പ്രവേശനം നടന്നിട്ടുണ്ടെന്ന് കണ്ടെത്തിയാല്‍ കര്‍ശന നടപടിയുണ്ടാകുമെന്നും കമ്മിറ്റി മുന്നറിയിപ്പ് നല്‍കി.
സ്വാശ്രയ മെഡിക്കല്‍ കോളജുകളില്‍ സെപ്റ്റംബര്‍ 28 ന് ശേഷം സ്വന്തം നിലയ്ക്ക് പ്രവേശനം നടത്തരുതെന്നും ഏകീകൃത കൗണ്‍സിലിങിന്റെ അടിസ്ഥാനത്തിലാകണം പ്രവേശനമെന്ന സുപ്രീം കോടതി ഉത്തരവിന്റെ അടിസ്ഥാനത്തിലാണ് ജെയിംസ് കമ്മിറ്റിയുടെ ഇടപെടല്‍.
സെപ്റ്റംബര്‍ 28 വരെ മാത്രമേ മാനേജ്‌മെന്റുകള്‍ക്ക് നിലവിലെ രീതിയില്‍ പ്രവേശനം നടത്താന്‍ അനുവാദം നല്‍കിയിരുന്നുള്ളൂ.  ഇതിനു ശേഷം നടന്ന  പ്രവേശനങ്ങളെല്ലാം റദ്ദാക്കുമെന്നാണ് ജയിംസ് കമ്മിറ്റി വ്യക്തമാക്കിയിരിക്കുന്നത്.
ഇതുവരെ നടന്നിട്ടുള്ള പ്രവേശനങ്ങളുടെ വിവരങ്ങള്‍ സമര്‍പ്പിക്കാന്‍ സ്വാശ്രയ മാനേജ്‌മെന്റുകള്‍ക്ക് കമ്മിറ്റി നിര്‍ദേശം നല്‍കിയിട്ടുണ്ട്.