പരപ്പനങ്ങാടി: രാത്രിയുടെ മറവില്‍ വീടിന് മേല്‍ കരിഓയില്‍ ഒഴിച്ചും കിണറ്റില്‍ ബാര്‍ബര്‍ ഷോപ്പില്‍ നിന്നുള്ള മുടികളും മറ്റും കൊണ്ടിട്ടും കരിഓയില്‍ ഒഴിച്ചും നശിപ്പിച്ചു. പരപ്പനങ്ങാടി ചിറമംഗലം ഉപ്പൂണിപ്പുറം ക്ഷേത്രത്തിന് സമീപം താമസിക്കുന്ന പത്ര വിതരണ ഏജന്റ് കാട്ടില്‍ ഉണ്ണികൃഷ്ണന്റെ വീടിനുനേരെയാണ് സാമൂഹ്യദ്രോഹികളുടെ അക്രമമുണ്ടായത്.
ഇന്നലെ പുലര്‍ച്ചെയാണ് ഉണ്ണികൃഷ്ണന്‍ സംഭവമറിയുന്നത്. പുലര്‍ച്ചെ നാലുമണിയോടെ പത്രവിതരണത്തിനായി പുറത്തിറങ്ങിയപ്പോഴാണ് കിണറിനരികെ ബാര്‍ബര്‍ ഷോപ്പില്‍ നിന്നുള്ള മുടികള്‍ കാണപ്പെട്ടത്. പിന്നീട് വീടിന് മുന്‍വശത്തെത്തിയപ്പോള്‍ ചുമരിലുമൊക്കെയായി കരി ഓയില്‍ ഒഴിച്ച് നശിപ്പിച്ച നിലയിലായിരുന്നു. രാത്രിയുടെ മറവിലാണ് ഇത്തരത്തില്‍ സാമൂഹ്യദ്രോഹികള്‍ വിളഞ്ഞാടിയത്. ബി.ജെ.പി പരപ്പനങ്ങാടി ഏരിയ പ്രസിഡന്റാണ് ഉണ്ണികൃഷ്ണന്‍. രാഷ്ട്രീയ പകപോക്കലിന്റെ ഭാഗമായുളളതായിരിക്കാം ഇതെന്നാണ് ഉണ്ണികൃഷ്ണന്‍ പറയുന്നത്. കിണറിലെ വെള്ളം ഉപയോഗിക്കാന്‍ പറ്റാത്ത നിലയില്‍ മലിനമായാമായതിനാല്‍  വീട്ടിലെ അന്നവും വഴിമുട്ടിയിരിക്കുകയാണ്. ഉണ്ണികൃഷ്ണന്റെ പത്രവിതരണത്തിനുപയോഗിക്കുന്ന സൈക്കിള്‍ പൂര്‍ണമായും കരിഓയിലില്‍ മുങ്ങിയതിനാല്‍ ഇന്നലെത്തെ പത്ര വിതരണവും തടസപ്പെട്ടു .
പത്തുവര്‍ഷത്തോളമായി നടന്നുകൊണ്ടിരിക്കുന്ന വീടിന്റെ പണി പൂര്‍ത്തിയായി വരുന്നേയുളളൂ. ഭാര്യയും മൂന്ന് പെണ്‍മക്കളുമടങ്ങുന്ന ഉണ്ണികൃഷ്ണന്റെ കുടുംബം തൊട്ടടുത്ത് തന്നെ ഒരു ഷെഡിലാണ് താമസിക്കുന്നത്. പരപ്പനങ്ങാടി പൊലിസ് സംഭവ സ്ഥലത്തെത്തി പരിശോധന നടത്തി. ഉച്ചയോടെ മലപ്പുറത്ത് നിന്നു ഡോഗ്‌സ്‌കോഡും വിരലടയാള വിദഗ്ദ്ധരും സ്ഥലത്തെത്തി പരിശോധന നടത്തി. പ്രതികളെ കണ്ടെത്താന്‍ അന്വേഷണം ഊര്‍ജിതപ്പെടുത്തിയാതായി പരപ്പനങ്ങാടി എസ്.ഐ കെ.ജെ ജിനേഷ് പറഞ്ഞു.