ബാലുശ്ശേരി: നന്മണ്ട-നരിക്കുനി റോഡില്‍ കാരക്കുന്നത്തു സ്വകാര്യ വ്യക്തിയുടെ വയലില്‍ ഹോട്ടല്‍ മാലിന്യം തള്ളി. അസഹനീയ ദുര്‍ഗന്ധം വ്യാപിച്ചതിനെ തുടര്‍ന്നു നാട്ടുകാര്‍ തെരച്ചില്‍ നടത്തിയപ്പോഴാണു മാലിന്യം കണ്ടെത്തിയത്.
വയല്‍ മുഴുവന്‍ വ്യാപിച്ച മാലിന്യത്തില്‍നിന്നുള്ള  ദുര്‍ഗന്ധം കാരണം കച്ചവടക്കാരും പരിസരവാസികളും പൊറുതിമുട്ടിയിരിക്കുകയാണ്. ഇതിനുമുന്‍പു രാത്രി സമയത്തു വയലില്‍ മാലിന്യം തള്ളിയിരുന്നു. നാട്ടുകാര്‍ കൊളത്തൂര്‍ പ്രാഥമികാരോഗ്യ കേന്ദ്രത്തിലും ബാലുശ്ശേരി പൊലിസ് സ്റ്റേഷനിലും വിവരമറിയിച്ചതിനെ തുടര്‍ന്ന് ജൂനിയര്‍ ഹെല്‍ത്ത് ഇന്‍സ്‌പെക്ടറുടെ നേതൃത്വത്തിലെത്തിയ ആരോഗ്യ വകുപ്പ് അധികൃതര്‍ രോഗാണു വ്യാപനം തടയുന്നതിനു നടപടിയെടുത്തു. നാട്ടുകാരുടെ നേതൃത്വത്തില്‍ മാലിന്യം തള്ളുന്നതു നിരീക്ഷിക്കാന്‍ പ്രത്യേക സ്‌ക്വാഡ് രൂപീകരിച്ചിട്ടുണ്ട്.