തൈക്കടപ്പുറം: തീരദേശവാസികള്‍ക്കു അവശ്യസാധനങ്ങള്‍ എത്തിക്കാനായി സര്‍ക്കാര്‍ അനുവദിച്ച ഫ്‌ളോട്ടിങ് ത്രിവേണി ഫലം കണ്ടില്ല. നാലു വര്‍ഷം മുന്‍പു അനുവദിച്ച ഫ്‌ളോട്ടിങ് ത്രിവേണിയാണു നീലേശ്വരം തൈക്കടപ്പുറത്തു നശിച്ചുകൊണ്ടിരിക്കുന്നത്. നീലേശ്വരം നഗരസഭ, വലിയപറമ്പ്, പടന്ന, ചെറുവത്തൂര്‍ പഞ്ചായത്തുകളിലെ തീരദേശവാസികളായ ആയിരക്കണക്കിനു കുടുംബങ്ങള്‍ക്കു ഉപകാരപ്രദമാകുന്ന തരത്തിലാണു ഫ്‌ളോട്ടിങ് ത്രിവേണി അനുവദിച്ചത്.
40 ലക്ഷം രൂപയായിരുന്നു ഇതിന്റെ നിര്‍മാണ ചെലവ്. എന്നാല്‍ ഒരിക്കല്‍ പോലും ഇതിന്റെ ഗുണം ജനങ്ങളിലെത്തിയില്ലെന്നാണ് ആരോപണം. അഴിമതിയുടെ കറ പുരണ്ടതോടെ തുടര്‍നടപടികളും നിലച്ചു. ഇതു പുനരാരംഭിക്കണമെന്നാവശ്യപ്പെട്ടു ജനങ്ങള്‍ നിരവധി തവണ അധികൃതരെ സമീപിച്ചെങ്കിലും ഫലം കണ്ടില്ല.
ഇതിനായി നിര്‍മിച്ച പ്രത്യേക ബോട്ട് മേല്‍ക്കൂര ഇളകിയും അടിത്തട്ടു തകര്‍ന്നും പൂര്‍ണമായും നശിച്ചു. ദീര്‍ഘവീക്ഷണമില്ലായ്മയും അഴിമതിയുമാണു ഇതിന്റെ തകര്‍ച്ചയ്ക്കു കാരണമായി ചൂണ്ടിക്കാട്ടപ്പെടുന്നത്.