തിരുവനന്തപുരം: ട്രെയിനില്‍ സ്ലീപ്പര്‍ ക്ലാസ് സീറ്റില്‍ ചാഞ്ഞുറങ്ങുന്ന മുന്‍ മുഖ്യമന്ത്രി ഉമ്മന്‍ ചാണ്ടിയുടെ ചിത്രം വൈറലാകുന്നു. ദേശീയ മാധ്യമങ്ങളിലടക്കം ഉമ്മന്‍ ചാണ്ടിയുടെ ജനകീയയാത്ര ഏറ്റുപിടിച്ചിട്ടുണ്ട്. ഉത്തരേന്ത്യന്‍ സംസ്ഥാനങ്ങളിലെ വിഐപി രാഷ്ട്രീയത്തിന്റെ പശ്ചാത്തലത്തില്‍ കേരളത്തില്‍നിന്നൊരു ജനകീയ നേതാവിനെ കൗതുകത്തോടെയാണ് പല ദേശീയ മാധ്യമങ്ങളും നോക്കിക്കണ്ടത്.




തന്റെ നാടായ കോട്ടയത്തുനിന്ന്  തിരുവനന്തപുരത്തേക്കാണ് ഉമ്മന്‍ ചാണ്ടി തിങ്കളാഴ്ച ശബരി എക്‌സ്പ്രസില്‍ സ്ലീപ്പര്‍ ക്ലാസില്‍ യാത്രചെയ്തത്. ഒപ്പമുള്ളവരോട് കുശലം പറഞ്ഞും ഇടയ്‌ക്കൊന്ന് ഉറങ്ങിയും അവരില്‍ ഒരാളായി നാട്ടുകാരുടെ സ്വന്തം കുഞ്ഞൂഞ്ഞ്.




പ്രാദേശിക നേതാവുപോലും വിഐപി ക്ലാസില്‍ യാത്രചെയ്യുന്ന ഇക്കാലത്താണ് ഉമ്മന്‍ ചാണ്ടിയുടെ സ്ലീപ്പര്‍ ക്ലാസിലെ യാത്രയെന്ന് ഒരു പ്രമുഖ ദേശീയ മാധ്യമം റിപ്പോര്‍ട്ടു ചെയ്തു.




തിരക്കില്ലാത്ത സമയങ്ങളില്‍ സ്ലീപ്പര്‍ ക്ലാസില്‍ യാത്ര ചെയ്യുന്നതാണ് തനിക്ക് സൗകര്യമെന്ന് ഉമ്മന്‍ ചാണ്ടി പറയുന്നു. കൂടുതല്‍ ആളുകളുമായി ഇടപഴകാന്‍ ഇതിലൂടെ സാധിക്കും. വിഐപി ക്ലാസുകളില്‍ തികച്ചും ഏകാന്തതയായിരിക്കും. വിഐപി  പരിഗണനയില്‍ ഞാന്‍ വിശ്വസിക്കുന്നില്ല- അദ്ദേഹം പറയുന്നു.



ഐക്യരാഷ്ട്രസഭ ആഗോള തലത്തില്‍ പൊതുജന സേവനത്തിനു നല്‍കുന്ന പുരസ്‌കാരം ലഭിച്ച ഉമ്മന്‍ ചാണ്ടി ഇതാദ്യമല്ല ജനകീയ യാത്രകള്‍ നടത്തുന്നത്.



ഏതാനും മാസങ്ങള്‍ക്കുമുന്‍പ് ലോഫ്‌ളോര്‍ ബസില്‍ കൊല്ലത്തുനിന്ന് തിരുവനന്തപുരത്തേക്ക് യാത്രചെയ്തത് വാര്‍ത്തയായിരുന്നു.



വിമാനത്തില്‍ യാത്ര ചെയ്യാനുള്ള സൗകര്യങ്ങള്‍ വര്‍ധിപ്പിക്കാന്‍ ചര്‍ച്ച അടുത്തിടെയാണ് പാര്‍ലമെന്റില്‍ നടന്നത്.



വിമാനത്താവളത്തിലും വിമാനത്തിലും ചെക്കിന്‍ ചെയ്യുമ്പോള്‍ പ്രത്യേക പരിഗണന, നിരക്ക് വര്‍ധിക്കുന്നതില്‍നിന്നു എംപിമാരെ ഒഴിവാക്കണം, വിമാനത്തില്‍ കയറുമ്പോഴും ഇറങ്ങുമ്പോഴും വിമാനത്താവളത്തില്‍ എത്തുമ്പോഴും പ്രത്യേക പരിണനയും ആദ്യം കയറുന്നതിനും  അനുവദിക്കണം, വിമാനത്തില്‍ ബിസിനസ് ക്ലാസില്‍ പ്രയോരിറ്റി ഉറപ്പാക്കണം തുടങ്ങിയ ആവശ്യങ്ങള്‍ ഉന്നയിച്ച് എംപിമാര്‍ പാര്‍ലമെന്റിന്റെ ഓഫിസില്‍ ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ അധികൃതരെ വിളിച്ചു വരുത്തിയാണ് ചര്‍ച്ചചെയ്തത്.


 ഈ അവസരത്തിലാണ് ഉമ്മന്‍ ചാണ്ടി രാഷ്ട്രീയക്കാര്‍ക്ക് മാതൃകയാകുന്നതെന്ന് ദേശീയ മാധ്യമം റിപ്പോര്‍ട്ടു ചെയ്തു.