മഞ്ചേരി:  ജനാധിപത്യപരമായ രീതിയില്‍ നടക്കുന്ന സമരങ്ങളെ  ഇടതുസര്‍ക്കാറിനു അടിച്ചമര്‍ത്താനാവില്ലെന്ന് ഷാഫിപറമ്പില്‍  എം.എല്‍.എ പറഞ്ഞു. പൊലിസിന്റെ അന്യായമായ നടപടികള്‍ക്കെതിരെ  യൂത്ത് കോണ്‍ഗ്രസ് മലപ്പുറം പാര്‍ലമെന്റ് മണ്ഡലം പ്രസിഡന്റ് റിയാസ് മുക്കോളിയുടെ നേതൃത്വത്തില്‍  മഞ്ചേരി സബ് ജയിലില്‍ നടത്തിയ  നിരാഹാര സമരം അവസാനിപ്പിച്ചു സംസാരിക്കുകയായിരുന്നു അദ്ദേഹം. കരിങ്കൊടി കാണിച്ചതിനു ഇത്രയധികം ക്രൂരത പൊലിസ് നടത്തുന്നത് മുഖ്യമന്ത്രി യൂത്ത് കോണ്‍ഗ്രസ് പ്രവര്‍ത്തകരെ എത്രമാത്രം ഭയക്കുന്നുവെന്നതിനു തെളിവാണ്.
സര്‍ക്കാറിന്റെ തെറ്റായ നയങ്ങള്‍കെതിരായ സമരം  സംസ്ഥാനമാകെ വ്യാപിപ്പിക്കുമെന്നും ജില്ലയിലെ കോണ്‍ഗ്രസ് പ്രവര്‍ത്തകരുടെ വികാരം സഭയില്‍ അവതരിപ്പിക്കുമെന്നും എം.എല്‍.എ പറഞ്ഞു. റിയാസ് മുക്കോളിയേയും സഹപ്രവര്‍ത്തകരേയും  ടി.വി ഇബ്രാഹീം എം.എല്‍.എ, ഡി.സി.സി പ്രസിഡന്റ്  ഇ മുഹമ്മദ് കുഞ്ഞി, കെ.പി.സി.സി സെക്രട്ടറി വി.എ കരീം, ഡി.സി.സി ട്രഷറര്‍ വല്ലാഞ്ചിറ ഷൗക്കത്തലി,  ജില്ലാ പഞ്ചായത്ത് അംഗം വി.സുധാകരന്‍,  അഡ്വ. ബീനാജോസഫ് എന്നിവരും  സന്ദര്‍ശിച്ചു.
മഞ്ചേരിയിലെത്തിയ ഷാഫി പറമ്പില്‍ എം.എല്‍.എയെ ബ്ലോക്ക് കോണ്‍ഗ്രസ് പ്രസിഡന്റ് വല്ലാഞ്ചിറ ഹുസൈന്‍, പി.കെ സത്യപാലന്‍, പി.എം.എ നാസര്‍ എന്നിവര്‍ ചേര്‍ന്ന് സ്വീകരിച്ചു.