തൃശൂര്‍: നിയമസഭാ തെരഞ്ഞെടുപ്പിന്റെ സുരക്ഷാ ക്രമീകരണങ്ങള്‍ക്കായി ജില്ലയില്‍ 6259 അംഗ പൊലിസ് സേനയെ വിന്യസിക്കുമെന്ന് സുരക്ഷാ ചുമതലയുളള നോഡല്‍ ഓഫിസര്‍ കൂടിയായ സബ് കലക്ടര്‍ ഹരിത.വി.കുമാര്‍ അറിയിച്ചു. ഇന്‍ഡോ തിബറ്റന്‍ ബോര്‍ഡര്‍ പൊലിസ് ഫോഴ്‌സ്, സി.ഐ.എസ്.എഫ് എന്നിവരടങ്ങുന്ന കേന്ദ്ര സേനയേയും തെരഞ്ഞെടുപ്പ് സുരക്ഷക്കായി നിയോഗിച്ചു. ജില്ലാ റൂറല്‍ പൊലിസ് 1480 ബൂത്തുകള്‍ക്കും സിറ്റി പൊലിസ് 539 ബൂത്തുകള്‍ക്കും സുരക്ഷ നല്‍കും. ജില്ലയിലാകെ 244 ബൂത്തുകളെ പ്രശ്‌നബാധിത ബൂത്തുകളായി കണ്ടെത്തിയിട്ടുണ്ട്. ഇതില്‍ 118 എണ്ണം റൂറല്‍ പൊലിസിന്റെ പരിധിയിലും 126 എണ്ണം നഗരപരിധിയിലുമാണ്.സുരക്ഷാ ക്രമീകരണങ്ങളുടെ ഭാഗമായി ബൂത്തുകളെ പ്രത്യേക സബ് ഡിവിഷനുകളായി തരംതിരിച്ചിട്ടുണ്ട്. 11 ഡി.വൈ.എസ.്പിമാര്‍, 20 സര്‍ക്കിള്‍ ഇന്‍സ്‌പെക്ടര്‍മാര്‍, 222 സബ് ഇന്‍സ്‌പെക്ടര്‍മാര്‍, 432 കേന്ദ്ര സേനാംഗങ്ങള്‍, 105 വനിതാ പൊലിസ്, 596 സ്‌പെഷ്യല്‍ പൊലിസ്, 1709 സിവില്‍ പൊലിസ് ഓഫിസര്‍മാര്‍ എന്നിവര്‍ ഉള്‍പ്പെടെ 3095 പൊലിസ് ഉദ്യോഗസ്ഥരെ റൂറല്‍ പരിധിയില്‍ തെരഞ്ഞെടുപ്പ് ഡ്യൂട്ടിക്കായി വിന്യസിച്ചിട്ടുണ്ട്. സിറ്റി പൊലിസ് കമ്മീഷണറുടെ കീഴില്‍ 11 ഡി.വൈ.എസ്.പിമാര്‍, 15 സര്‍ക്കിള്‍ ഇന്‍സ്‌പെക്ടര്‍മാര്‍, 133 സബ് ഇന്‍സ്‌പെക്ടര്‍മാര്‍, 275 കേന്ദ്ര സേനാംഗങ്ങള്‍, 905 പൊലിസ് ഉദ്യോഗസ്ഥര്‍, 244സ്‌പെഷ്യല്‍ പൊലിസ്, 1581 സിവില്‍ പൊലിസ് ഓഫിസര്‍മാര്‍ ഉള്‍പ്പെടെ 3164 പൊലിസ് ഉദ്യോഗസ്ഥരാണ് തെരെഞ്ഞെടുപ്പ് ഡ്യൂട്ടിക്കായി തൃശൂര്‍ നഗരപരിധിയില്‍ ഉണ്ടാവുക. സ്‌പെഷ്യല്‍ പൊലിസ് ഓഫിസര്‍മാരായി തെരഞ്ഞെടുപ്പ് ഡ്യൂട്ടി ലഭിച്ചവര്‍ക്കുള്ള പരിശീലനം 13ന് ആരംഭിക്കും. നഗരപരിധിയിലുള്ളവര്‍ക്ക് രാമവര്‍മ്മപുരം ജില്ലാ പൊലിസ് ആസ്ഥാനത്തും റൂറല്‍ പരിധിയിലുള്ളവര്‍ക്ക് അതത് സര്‍ക്കിള്‍ ഇന്‍സ്‌പെക്ടര്‍മാരുടെ കീഴിലുമായിരിക്കും പരിശീലനം. ജില്ലയിലെ പ്രശ്‌നബാധിത ബൂത്തുകളില്‍ ഇന്‍ഡോ തിബറ്റന്‍ പൊലിസ് ഫോഴ്‌സും സി.ഐ.എസ്.എഫും തെരഞ്ഞെടുപ്പു ദിവസം ഡ്യൂട്ടിയില്‍ ഉണ്ടായിരിക്കും.