കോഴിക്കോട്: ആള്‍ക്കൂട്ടത്തിനു നടുവില്‍നിന്ന് ഉമ്മന്‍ചാണ്ടിയുടെ കാതില്‍ പതിഞ്ഞ എട്ടു വയസുകാരി ശിവാനിയുടെ അഭ്യര്‍ഥന യാഥാര്‍ഥ്യത്തിലേക്ക്. സ്വന്തമായി കൂരയില്ലാത്ത ശിവാനിയുടെ സഹപാഠി അമല്‍ കൃഷ്ണയുടെ സ്വപ്നവീടിന് ഇന്നലെ തറക്കല്ലിട്ടു. നന്മനിറഞ്ഞുനിന്ന ശുഭമുഹൂര്‍ത്തത്തില്‍ കക്കുഴിപ്പടിപറമ്പ് കുണ്ടൂപ്പറമ്പ് ഗവ. ഹയര്‍ സെക്കന്‍ഡറി സ്‌കൂളിനു സമീപത്തുനടന്ന ചടങ്ങില്‍ റവന്യൂ മന്ത്രി ഇ. ചന്ദ്രശേഖരനാണ് തറക്കല്ലിടല്‍ കര്‍മ്മം നിര്‍വഹിച്ചത്. ഉമ്മന്‍ചാണ്ടിയുടെയും നാട്ടുകാരുടെയും സഹായത്താലാണ് അമലിന്റെ സ്വപ്നവീട് ഉയരുന്നത്. ഗവ. ടീച്ചേഴ്‌സ് ട്രെയിനിങ് ഇന്‍സ്റ്റിറ്റിറ്റിയൂട്ടിന്റെ ഭാഗമായ മോഡല്‍ എല്‍.പി സ്‌കൂളിലെ മൂന്നാം ക്ലാസ് വിദ്യാര്‍ഥിയാണ് അമല്‍ കൃഷ്ണ. അമല്‍ കൃഷ്ണയും രോഗികളായ അച്ഛന്‍ പി. സുജീഷും അമ്മ അനിലയും പൊട്ടിപ്പൊളിഞ്ഞ വീട്ടില്‍ ദയനീയാവസ്ഥയില്‍ കഴിഞ്ഞുവരികയായിരുന്നു.
കഴിഞ്ഞ മാര്‍ച്ച് മൂന്നിന് നടക്കാവ് ഗവ. ടി.ടി.ഐയിലെ ഒരു ചടങ്ങിനിടെയാണ് വിഷയം അന്നത്തെ മുഖ്യമന്ത്രിയായിരുന്ന ഉമ്മന്‍ചാണ്ടിയുടെ ശ്രദ്ധയിലെത്തിയത്. ആള്‍ക്കൂട്ടത്തില്‍നിന്നും തന്റെയടുത്തെത്തി സഹപാഠിയായ അമല്‍ കൃഷ്ണയെ സഹായിക്കണമെന്ന ശിവാനിയുടെ അഭ്യര്‍ഥന അദ്ദേഹത്തെ അത്ഭുതപ്പെടുത്തി.
സര്‍ക്കാര്‍ സഹായം നല്‍കാന്‍ ഉമ്മന്‍ചാണ്ടി നിര്‍ദേശിച്ചെങ്കിലും നടപടികള്‍ തെരഞ്ഞെടുപ്പു ചട്ടങ്ങളില്‍ കുരുങ്ങുകയായിരുന്നു. പുതിയ സര്‍ക്കാര്‍ ഇക്കാര്യം പരിഗണിച്ചു വരുന്നതുവരെയുള്ള താമസം ഒഴിവാക്കാനായി ഉമ്മന്‍ചാണ്ടിതന്നെ വ്യക്തിപരമായി തുക സംഘടിപ്പിച്ചു നല്‍കി. അധികാരം വിട്ടൊഴിഞ്ഞിട്ടും മൂന്നുലക്ഷത്തോളം രൂപയാണ് അമലിനുവേണ്ടി അദ്ദേഹം സമാഹരിച്ചുനല്‍കിയത്. ഇതോടെ ഭവന നിര്‍മാണ കമ്മിറ്റിയും സജീവമായി. ഭവന നിര്‍മാണ കമ്മിറ്റി ചെയര്‍മാന്‍ കെ.പി വിജയകുമാറിന്റെയും ജനറല്‍ കണ്‍വീനര്‍ ബാബു തത്തക്കാടന്റെയും ടി.ടി.ഐ പ്രിന്‍സിപ്പല്‍ ടി.സി റോസ്‌മേരിയുടെയും നേതൃത്വത്തില്‍ പതിനഞ്ച് ലക്ഷത്തോളം രൂപ സ്വരൂപിച്ചു. അമല്‍ കൃഷ്ണയുടെ മാതാപിതാക്കള്‍ രോഗബാധിതരാണെന്നതു പരിഗണിച്ചു കുടുംബത്തിനു വരുമാനമാര്‍ഗമെന്ന നിലയില്‍ ഒരുനില വാടകയ്ക്കു നല്‍കുംവിധമായിരിക്കും കെട്ടിടം പണിയുക. ഉമ്മന്‍ചാണ്ടി ഉള്‍പ്പെടെയുള്ളവര്‍ അമല്‍ കൃഷ്ണയുടെ കുടുംബത്തെ സഹായിക്കാന്‍ രംഗത്തെത്തി. രോഗികളെയും അവശരെയും സഹായിക്കുന്നതിന് എന്നും ശ്രദ്ധ പതിപ്പിച്ച മാതൃകയാണ് ഉമ്മന്‍ചാണ്ടിയുടേതെന്ന് മന്ത്രി അഭിപ്രായപ്പെട്ടു.
തറക്കല്ലിടല്‍ ചടങ്ങില്‍ കമ്മിറ്റി ചെയര്‍മാന്‍ കെ.പി വിജയകുമാര്‍ അധ്യക്ഷനായി. ടി.സി റോസ് മേരി, ബാബു തത്തക്കാടന്‍, വാര്‍ഡ് കൗണ്‍സിലര്‍ ടി.എസ് ഷിംജിത്ത്, പി. കിഷന്‍ ചന്ദ്, രമേഷ് നമ്പിയത്ത്, പി.വി മാധവന്‍, പി. ഗവാസ്, മനോജ് കുണ്ടൂപ്പറമ്പ്, ടി.കെ പ്രമോദ്, പി.ജെ ജോഷ്വ, ശ്രീകാന്ത് കോട്ടക്കല്‍, കെ. ഗോപാലകൃഷ്ണന്‍, കെ. മോഹന്‍കുമാര്‍, എം.സി സുദേഷ് കുമാര്‍, എം. മുഹമ്മദ് റഷീദ്, കെ. അഖില, ഇ. സുനില്‍ കുമാര്‍, പി. സുനീറ സംബന്ധിച്ചു.