കൊട്ടിയം(കൊല്ലം): വില്ലേജ് ഫീല്‍ഡ് അസിസ്റ്റന്റ് നിയമന യോഗ്യതയെ  സംബന്ധിച്ച് റവന്യൂവകുപ്പും പി.എസ്.സിയും തമ്മില്‍ തര്‍ക്കം. റവന്യൂ പ്രിന്‍സിപ്പല്‍ സെക്രട്ടറി കഴിഞ്ഞ ദിവസം പുറത്തിറക്കിയ ഉത്തരവില്‍ പി. എസ്. സി നേരത്തേ നിശ്ചയിച്ച യോഗ്യത മാറ്റിയതാണ് പ്രശ്‌നത്തിനിടയാക്കിയത്.  പി.എസ്.സി നേരത്തേ ഇറക്കിയ വിജ്ഞാപനത്തില്‍ പറഞ്ഞിരിക്കുന്ന യോഗ്യതയായ ഏഴാം ക്ലാസ് എന്നതു മാറ്റി പത്താം ക്ലാസ് വിജയം എന്നാക്കി റവന്യൂ പ്രിന്‍സിപ്പല്‍ സെക്രട്ടറി ഉത്തരവിറക്കിയിരുന്നു.  
കഴിഞ്ഞ 29ന് പി.എസ്.സി പുറത്തിറക്കിയ വിജ്ഞാപനത്തില്‍ പഴയ വില്ലേജ് മാന്‍ തസ്തികയുടെ പേരു മാറ്റി വില്ലേജ് ഫീല്‍ഡ് അസിസ്റ്റന്റ് എന്നാക്കുകയും യോഗ്യത ഏഴാംക്ലാസ് ആയി നിശ്ചയിക്കുകയും ചെയ്തിരുന്നു. നവംബര്‍ രണ്ട് ആണ് വില്ലേജ് ഫീല്‍ഡ് അസിസ്റ്റന്റ് പരീക്ഷയ്ക്ക് അപേക്ഷിക്കാനുള്ള അവസാനതീയതി. അടിസ്ഥാനശമ്പളം 17000-37500 രൂപയാണ് വിജ്ഞാപനത്തില്‍ പറയുന്നത്.
14 ജില്ലകളിലേയ്ക്കും നേരിട്ടുള്ള നിയമനത്തിനാണ് പി.എസ്.സി അപേക്ഷ ക്ഷണിച്ചത്. ഇപ്പോള്‍ തന്നെ പി.എസ്.സി വിജ്ഞാപനത്തില്‍ പറയുന്ന ഏഴാം ക്‌ളാസ് യോഗ്യതയില്‍, ഓരോ ജില്ലയിലും പതിനായിരക്കണക്കിന് അപേക്ഷകള്‍ ഓണ്‍ലൈനായി ലഭിച്ചുകഴിഞ്ഞു. അതിനിടെയാണ്  തസ്തികയുടെ യോഗ്യത പത്താംക്ലാസ് ആണെന്ന് വ്യക്തമാക്കി രണ്ട് ദിവസം മുന്‍പ് റവന്യൂ പ്രിന്‍സിപ്പല്‍ സെക്രട്ടറി  പി.എച്ച്.കുര്യന്‍ ഉത്തരവിറക്കിയത്.
ഇതോടെ വിജ്ഞാപന പ്രകാരം പരീക്ഷ നടക്കാന്‍ വൈകുമെന്ന് ഉദ്യോഗാര്‍ഥികള്‍ക്കിടയില്‍ ആശങ്കയുയര്‍ന്നിട്ടുണ്ട്. ചില സര്‍വിസ് സംഘടനകളാണ് റവന്യൂ വകുപ്പിന്റെ പുതിയ നീക്കത്തിന് പിന്നിലെന്ന് അറിയുന്നു. പഴയ ഏഴാംക്ലാസ് യോഗ്യത തുടര്‍ന്നാല്‍ ജോലിയില്‍ ഇപ്പോഴുള്ളവര്‍ക്ക് പുതിയ ശമ്പളസ്‌കെയില്‍ ലഭിക്കാന്‍ നിയമതടസമുണ്ടായേക്കും. അതാണ്  യോഗ്യത ഉയര്‍ത്തി ഉത്തരവിറക്കാന്‍ സംഘടനകള്‍ സമ്മര്‍ദം ചെലുത്തിയതത്രേ.  ഫയലില്‍ ഉറങ്ങുകയായിരുന്നു ഇതുവരെ ഈ ഉത്തരവ്.
പി.എസ്.സി ഇപ്പോള്‍ ഇറക്കിയ വിജ്ഞാപനം തിരുത്തിയിറിക്കിയാല്‍ പ്രശ്‌നം പരിഹരിക്കപ്പെടുമെന്നാണ് അവരുടെ പക്ഷം.
എന്നാല്‍ ഇത് പരീക്ഷയ്ക്കായ് അപേക്ഷിച്ച ഏഴാം ക്ലാസ് യോഗ്യതയുള്ളവര്‍ക്ക് തിരിച്ചടിയാകുകയും ചെയ്യും.  
അതിനിടെ ഇനി ചേരുന്ന യോഗത്തില്‍ മാത്രമേ പി. എസ്. സി ഇക്കാര്യം ചര്‍ച്ച ചെയ്യുകയുള്ളൂ.  അതുകൊണ്ടുതന്നെ ഇക്കാര്യത്തില്‍ പി. എസ്. സിയുടെ തീരുമാനം എന്തായിരിക്കുമെന്ന് ആശങ്കയോടെ കാത്തിരിക്കുകയാണ് ഉദ്യോഗാര്‍ഥികള്‍.